اردوورلڈ کینیڈا( ویب نیوز)محکمہ موسمیات نے خبردار کیا ہے کہ کراچی میں آج موسلا دھار سے شدید موسلا دھار بارش ہوسکتی ہے، جس کے نتیجے میں شہری علاقوں میں اربن فلڈنگ کا خطرہ بڑھ گیا ہے۔
ماہرین کے مطابق شہر میں بارش کے چار سے چھ اسپیل متوقع ہیں اور بعض مقامات پر 100 ملی میٹر سے زیادہ بارش ریکارڈ ہو سکتی ہے۔ بتایا گیا ہے کہ یہ غیر معمولی موسمی نظام بھارت کی سمت سے سندھ میں داخل ہو رہا ہے، جو ڈیپریشن یا ڈیپ ڈیپریشن کی شکل اختیار کر چکا ہے۔ اس کا راستہ پیچیدہ ہونے کی وجہ سے مختلف علاقوں میں بارش کی شدت مختلف رہنے کا امکان ہے۔
گزشتہ روز کی بارش کے بعد ملیر ندی میں بھی طویل عرصے بعد سیلابی کیفیت پیدا ہوئی، جبکہ نشیبی علاقوں میں پانی جمع ہونے کی شکایات سامنے آئیں۔
موسم کی شدت کو مدنظر رکھتے ہوئے جناح سندھ میڈیکل یونیورسٹی نے آج ہونے والے تمام امتحانات ملتوی کر دیے ہیں۔ یونیورسٹی انتظامیہ نے ورک فرام ہوم پالیسی نافذ کرتے ہوئے اعلان کیا کہ کلاسز آن لائن لی جائیں گی۔ وائس چانسلر کے مطابق یہ فیصلہ طلباء اور عملے کی حفاظت کے پیشِ نظر کیا گیا ہے۔
انتظامیہ اور محکمہ موسمیات نے شہریوں کو ہدایت کی ہے کہ وہ غیر ضروری سفر سے اجتناب کریں اور بجلی کے کھمبوں، ننگی تاروں اور گہرے پانی والے مقامات سے دور رہیں۔ شہریوں کو ہنگامی صورتحال میں ریسکیو اداروں سے فوری رابطہ کرنے کی اپیل بھی کی گئی ہے۔
