اردوورلڈکینیڈا( ویب نیوز)کینیڈا کے سب سے بڑے تفریحی پارک کینیڈا ونڈر لینڈ نے اپنے سالانہ ہالووین ہانٹ ایونٹ کے آغاز سے قبل ایک نیا چَیپرون پالیسی (نگراں پالیسی) متعارف کرا دی ہے۔
اس پالیسی کے تحت 15 سال یا اس سے کم عمر تمام مہمانوں کو ایک ایسے بالغ کے ساتھ آنا لازمی ہوگا جس کی عمر کم از کم 21 سال ہو۔ بصورت دیگر نابالغ مہمانوں کو پارک میں داخل ہونے یا وہاں رکنے کی اجازت نہیں ہوگی۔
یہ نئی پابندی جمعہ، 26 ستمبر سے نافذ ہوگی اور شام 6 بجے کے بعد لازمی طور پر لاگو کی جائے گی۔ تاہم، پارک انتظامیہ نے واضح کیا ہے کہ ضرورت پڑنے پر وہ کسی بھی دن اس پالیسی کو اس وقت سے پہلے بھی لاگو کر سکتے ہیں۔
پالیسی کے مطابق ایک بالغ نگران (چَیپرون) زیادہ سے زیادہ 10 مہمان بچوں یا کم عمر لڑکوں/لڑکیوں کو ساتھ لا سکتا ہے، لیکن اسے پورے دورانیے میں ان کے ساتھ رہنا ضروری ہوگا۔
یہ خبر بھی پڑھیں ،کینیڈا میں اسٹرونگ پاس سے میوزیمز اور پارکس میں آنے والوں کی تعداد میں اضافہ ہوگیا
پارک کے جاری کردہ بیان میں کہا گیا ہے کہ کینیڈاز ونڈر لینڈ میں ہمارے مہمانوں اور عملے کی حفاظت ہمیشہ ہماری اولین ترجیح رہی ہے۔ ہم نے یہ پالیسی اس لیے متعارف کروائی ہے تاکہ صنعت میں بہترین طریقہ کار پر عمل ہو سکے، کیونکہ گزشتہ برسوں میں تفریحی پارکوں اور بڑے ایونٹس کے دوران غیر ذمہ دارانہ اور نامناسب رویے کے واقعات پیش آتے رہے ہیں۔
پارک میں آنے والے ایسے نوجوان جو 16 سال یا اس سے زائد عمر کے ہیں، ان سے عمر کی تصدیق کے لیے فوٹو شناختی کارڈ طلب کیا جا سکتا ہے، اور اگر وہ شناخت نہ دکھا سکیں تو داخلے سے انکار بھی کیا جا سکتا ہے۔
ہالووین ہانٹ ایونٹ 26 ستمبر سے شروع ہوگا اور 1 نومبر تک جاری رہے گا۔ یہ ایونٹ جمعہ اور ہفتہ کی راتوں کو شام 6 بجے سے نصف شب (12 بجے) تک کھلا ہوگا۔ اس کے علاوہ، اتوار کے دن 28 ستمبر سے 26 اکتوبر تک اور جمعرات کے دن 16 اکتوبر سے 30 اکتوبر تک بھی ایونٹ منعقد کیا جائے گا۔
یہ پالیسی خاص طور پر ان خاندانوں کے لیے اہم ہے جو اپنے کم عمر بچوں کے ساتھ ہالووین ہانٹ دیکھنے آنا چاہتے ہیں، کیونکہ بغیر بالغ نگران کے ان کا داخلہ ممکن نہیں ہوگا۔
