اردوورلڈکینیڈا( ویب نیوز)وزیراعظم محمد شہباز شریف اعلیٰ سطحی وفد کے ہمراہ ایک روزہ دورے پر قطر روانہ ہوگئے۔
ترجمان دفترِ خارجہ کے مطابق وزیراعظم کا یہ دورہ قطر پر ہونے والی اسرائیلی جارحیت کے تناظر میں ہے۔ وہ دوحہ پہنچ کر امیرِ قطر عزت مآب شیخ تمیم بن حماد الثانی، شاہی خاندان اور قطری عوام کے ساتھ یکجہتی کا اظہار کریں گے۔
وزیراعظم کے وفد میں نائب وزیراعظم و وزیرِ خارجہ محمد اسحاق ڈار، وزیرِ دفاع خواجہ محمد آصف، وزیرِ اطلاعات و نشریات عطاء اللہ تارڑ اور معاونِ خصوصی طارق فاطمی شامل ہیں۔
ترجمان کے مطابق وزیراعظم دوحہ میں امیرِ قطر سے ملاقات کے دوران اسرائیل کی جانب سے خطے کے مختلف ممالک پر مسلسل جارحانہ کارروائیوں، بین الاقوامی قوانین کی خلاف ورزی اور خطے میں امن کے قیام کے لیے مشاورت کریں گے۔
واضح رہے کہ پاکستان اور قطر کے درمیان دیرینہ تعلقات مشترکہ عقائد، اقدار اور تاریخی روابط پر مبنی ہیں، اور دونوں ممالک مختلف عالمی و علاقائی امور پر قریبی تعاون رکھتے ہیں۔
