اردوورلڈ کینیڈا( ویب نیوز)فیلڈ مارشل سید عاصم منیر نے قصور اور جلالپور پیروالا (ملتان) میں سیلاب ریلیف کیمپوں کا دورہ کیا اور متاثرین کو بحالی و آبادکاری میں تعاون کی یقین دہانی کرائی۔
پاک فوج کے شعبہ تعلقات عامہ کے مطابق فیلڈ مارشل کا دورہ موجودہ سیلابی صورتحال اور جاری امدادی کارروائیوں کا جائزہ لینے کے لیے کیا گیا۔ اس دوران انہیں متاثرہ علاقوں میں ریسکیو اور ریلیف آپریشنز کی تفصیلات فراہم کی گئیں۔
قصور اور ملتان کے سیلاب زدہ علاقوں کے اس دورے کا مقصد سول انتظامیہ اور فوج کے درمیان بہتر ہم آہنگی قائم کرنا تھا تاکہ متاثرہ افراد کو مؤثر امداد فراہم کی جا سکے۔ اس موقع پر چیف سیکرٹری پنجاب اور دیگر اعلیٰ سول حکام بھی موجود تھے۔
فیلڈ مارشل نے سول انتظامیہ کے ساتھ گفتگو میں اچھی حکمرانی اور عوام پر مبنی ترقی کی اہمیت پر زور دیا۔ انہوں نے کہا کہ بار بار آنے والے سیلاب کے نقصانات سے عوام کی حفاظت کے لیے ضروری انفراسٹرکچر کی ترقی اور فوری اقدامات کرنا لازمی ہیں، کیونکہ ریاست ہر سال جانی و مالی نقصان برداشت نہیں کر سکتی۔
انہوں نے مزید کہا کہ سیلاب سے متاثرہ افراد کے مسائل سے نمٹنے کے لیے سول اور فوجی اداروں کی مربوط کوششیں انتہائی اہم ہیں اور پاک فوج عوامی فلاح کے تمام اقدامات میں بھرپور تعاون جاری رکھے گی۔
فیلڈ مارشل نے متاثرین سے ملاقات کرتے ہوئے بحالی اور آبادکاری کے عمل میں مکمل تعاون کی یقین دہانی کرائی، جس پر متاثرین نے بروقت امداد فراہم کرنے پر پاک فوج کا شکریہ ادا کیا۔
آرمی چیف نے ریلیف آپریشنز میں مصروف فوجی جوانوں، ریسکیو 1122 اہلکاروں اور پولیس حکام سے بھی ملاقات کی، ان کی حوصلہ افزائی کی اور عوام کی خدمت کے لیے ان کے غیر متزلزل عزم کو سراہا۔ انہوں نے سول انتظامیہ کی کوششوں کی بھی تعریف کی جو عوام کو بروقت امداد فراہم کرنے کے لیے دن رات مصروف ہیں۔
مزید برآں، فیلڈ مارشل سید عاصم منیر نے لاہور، قصور، ملتان اور جلالپور پیروالا کے سیلاب متاثرہ علاقوں کا فضائی جائزہ بھی لیا تاکہ نقصانات کے حجم اور جاری امدادی سرگرمیوں کا اندازہ لگایا جا سکے۔ ان کے پہنچنے پر لاہور اور ملتان کور کے کمانڈرز نے ان کا استقبال کیا۔
