قطری وزیراعظم شیخ محمد بن عبدالرحمن نے دوحہ میں عرب اسلامی ہنگامی اجلاس کے سلسلے میں وزرائے خارجہ کے اجلاس سے خطاب کرتے ہوئے کہا کہ عرب اور اسلامی ممالک نے قطر پر اسرائیل کے وحشیانہ حملے کی مذمت کی ہے۔انہوں نے کہا کہ عرب اور اسلامی ممالک اس کی خودمختاری کے تحفظ میں قطر کا ساتھ دیں گے۔قطری وزیراعظم نے کہا کہ ہم برادر عرب اور اسلامی اور عالمی برادریوں کی طرف سے دوست ممالک کی طرف سے اظہار یکجہتی اور اسرائیلی بربریت اور جارحیت کی مذمت پر شکر گزار ہیں۔انہوں نے کہا کہ ان ممالک نے ہمارے ساتھ مکمل تعاون کا اظہار کیا ہے اور ہمارے ملک کی خودمختاری کے لیے قانونی اقدامات کیے جائیں گے۔شیخ محمد نے کہا کہ اب وقت آگیا ہے کہ عالمی برادری دوہرا معیار ترک کرے اور اسرائیل کو ان تمام جرائم کا جوابدہ ٹھہرائے جو اس نے کیے ہیں۔