اردوورلڈکینیڈا( ویب نیوز)اسلام آباد کی انسداددہشت گردی عدالت نے پی ٹی آئی رہنما اسد قیصر کے وارنٹ گرفتاری جاری کر دیے ہیں۔ یہ کارروائی جوڈیشل کمپلیکس پر حملے کے کیس کے سلسلے میں کی گئی ہے، جس میں عدالت نے اسد قیصر کو گرفتار کر کے عدالت میں پیش کرنے کا حکم دیا۔

عدالت کے جج طاہر عباس سپرا نے کیس کی سماعت کی۔ اس دوران دیگر پی ٹی آئی رہنماوں، بشمول پرویز الٰہی، اسد عمر اور شبلی فراز کی حاضری سے استثنا کی درخواستیں منظور کی گئیں۔

بانی پی ٹی آئی کے حوالے سے وزارت قانون کو لکھے گئے خط کا ابھی تک کوئی جواب موصول نہیں ہوا۔ عدالت میں چوہدری پرویز الٰہی کی نمائندگی سردار محمد رزاق ایڈووکیٹ نے کی، جبکہ پی ٹی آئی رہنماوں کی جانب سے سردار محمد مصروف خان، آمنہ علی اور دیگر وکلاء پیش ہوئے۔

عدالت نے کیس کی مزید سماعت 6 اکتوبر تک ملتوی کر دی ہے۔ پی ٹی آئی رہنماوں کے خلاف تھانہ سی ٹی ڈی میں مقدمہ درج ہے۔