اردو ورلڈ کینیڈا ( ویب نیوز ) دنیا کے مصروف ترین فضائی مراکز میں شمار ہونے والا دبئی انٹرنیشنل ایئرپورٹ ٹیکنالوجی کے میدان میں ایک اور سنگِ میل عبور کرتے ہوئے مسافروں کے لیے دنیا کا پہلا مصنوعی ذہانت پر مبنی اسمارٹ کوریڈور متعارف کرا چکا ہے
جس کی بدولت امیگریشن کا عمل صرف چند سیکنڈز میں مکمل کیا جا سکتا ہے۔اس جدید نظام کے تحت مسافروں کو پاسپورٹ یا بورڈنگ پاس دکھانے کی ضرورت نہیں پڑتی، بلکہ مصنوعی ذہانت، چہرہ شناسائی اور بایومیٹرک ٹیکنالوجی کی مدد سے ان کی شناخت خودکار طور پر مکمل کر لی جاتی ہے۔ اسمارٹ کوریڈور ایک وقت میں باآسانی 10 افراد کو کلیئر کر سکتا ہے، جس سے ایئرپورٹ پر رش اور وقت کے ضیاع میں نمایاں کمی واقع ہوگی۔ فی الحال یہ سہولت ٹرمینل تھری کے بزنس کلاس ڈپارچر ہال میں دستیاب ہے۔
دبئی ایوی ایشن حکام کے مطابق یہ ٹیکنالوجی خاص طور پر فیملیز اور کثیر المسافر افراد کے لیے انتہائی سہولت فراہم کرے گی کیونکہ اس کے ذریعے بچوں اور بزرگوں کو قطار میں کھڑے ہونے یا بار بار دستاویزات دکھانے کی زحمت نہیں اٹھانی پڑے گی۔ آئندہ مرحلے میں اس سہولت کو ایئرپورٹ کے تمام ٹرمینلز تک توسیع دینے کا منصوبہ بنایا گیا ہے تاکہ ہر مسافر اس سہولت سے مستفید ہو سکے۔
عہدیداروں نے بتایا کہ اسمارٹ کوریڈور دبئی کے اس طویل المدتی وژن کا حصہ ہے جس کے تحت شہر کو دنیا کے جدید ترین اور ٹیکنالوجی پر مبنی مراکز میں شامل کرنے کی حکمت عملی اپنائی گئی ہے۔ اس اقدام سے نہ صرف ایئرپورٹ کی کارکردگی میں بہتری آئے گی بلکہ دبئی کو اسمارٹ سٹی اور عالمی سطح پر جدید ٹیکنالوجی کے مرکز کے طور پر مزید مستحکم مقام حاصل ہوگا۔
ماہرین کے مطابق دبئی انٹرنیشنل ایئرپورٹ کی جانب سے متعارف کرایا جانے والا یہ نظام مستقبل کی ایوی ایشن انڈسٹری کے لیے ایک مثال ہے، جو بتاتا ہے کہ کس طرح مصنوعی ذہانت روزمرہ زندگی کو تیز تر، محفوظ تر اور زیادہ سہل بنا سکتی ہے۔
