اردوورلڈکینیڈا( ویب نیوز)البرٹا میں صوبے بھر کے اساتذہ کی ہڑتال کے خدشے کے پیشِ نظر صوبائی حکومت نے ایک نیا مالی امدادی پروگرام شروع کرنے کا اعلان کیا ہے تاکہ کم عمر بچوں والے خاندانوں کے بوجھ کو کم کیا جا سکے۔
اساتذہ کی تنظیم (ATA) نے پیر کو اعلان کیا کہ ان کے ممبران کی بھاری اکثریت نے صوبائی حکومت کی نئی پیشکش مسترد کر دی ہے۔ یونین نے واضح کیا تھا کہ اگر معاہدہ رد ہو گیا تو اساتذہ 6 اکتوبر سے ہڑتال پر جائیں گے۔
اس کے جواب میں حکومت نے منگل کو Parent Support Payment Program شروع کرنے کا اعلان کیا، جس کے تحت 12 سال یا اس سے کم عمر کے ہر بچے کے لیے، جو اسکول بندش سے متاثر ہوگا، والدین کو روزانہ 30 ڈالر دیے جائیں گے۔
حکومت کے مطابق یہ رقم بچوں کی دیکھ بھال اور کھانے پینے کے اخراجات میں مدد کے لیے ہوگی۔ وزیر خزانہ نیٹ ہورنر نے بتایا کہ یہ فنڈز غیر استعمال شدہ تعلیمی گرانٹس سے فراہم کیے جائیں گے، خاص طور پر وہ رقوم جو اساتذہ کی تنخواہوں کے لیے مختص تھیں لیکن ہڑتال کے دوران خرچ نہیں ہوں گی۔
ادائیگیاں 31 اکتوبر سے شروع ہوں گی اور ماہانہ ای-ٹرانسفر کے ذریعے والدین کو ملیں گی۔ ادائیگیاں 6 اکتوبر سے ریٹرو ایکٹو ہوں گی تاکہ والدین کو اسکول بندش کے تمام دنوں کا معاوضہ مل سکے۔
اساتذہ کی یونین نے مؤقف اختیار کیا کہ والدین کو دیے جانے والے یہ 30 ڈالر یومیہ، موجودہ اساتذہ کی تنخواہ سے تقریباً دگنے ہیں۔یونین کے صدر جیسن شیلنگ نے کہایعنی حکومت اساتذہ کو معقول تنخواہ دینے کے بجائے والدین کو پیسے دے کر ہڑتال برداشت کرنے پر مجبور کر رہی ہے۔
این ڈی پی کے سربراہ نہید نینشی نے کہا کہ وزیرِ اعلیٰ ڈینیئل اسمتھ کو مذاکرات کی میز پر واپس آنا چاہیے، لیکن موجودہ حکومت ہر چیز پر خرچ کرنے کو تیار ہے، بس اساتذہ کے ساتھ منصفانہ معاہدہ کرنے پر نہیں۔ ان کے مطابق یہ امدادی منصوبہ روزانہ تقریباً 15 ملین ڈالر کا خرچ بنے گا۔فنڈز حاصل کرنے کے لیے والدین کو آن لائن رجسٹریشن کرنی ہوگی: account.alberta.ca
