اردوورلڈکینیڈا( ویب نیوز)وزیراعظم شہباز شریف نے کہا ہے کہ پاکستان اور ملائیشیا کے تعلقات نئی سمتوں میں بڑھ رہے ہیں اور دونوں ممالک مشترکہ منصوبوں کے ذریعے ترقی کے عمل کو آگے بڑھانا چاہتے ہیں۔
کوالالمپور میں ملائیشین وزیراعظم انور ابراہیم کے ساتھ مشترکہ پریس کانفرنس میں شہباز شریف نے کہا کہ ملائیشیا کا یہ ان کا پہلا دورہ ہے، اور وہ والہانہ استقبال پر صدر داتو سری اور وزیراعظم انور ابراہیم کے شکر گزار ہیں۔ انہوں نے کہا کہ ملائیشیا ان کے لیے دوسرا گھر ہے اور دونوں ممالک کے تعلقات دوستی، اعتماد اور تعاون پر مبنی ہیں۔
وزیراعظم نے کہا کہ انور ابراہیم ایک قابل اور وژنری رہنما ہیں جنہوں نے ملائیشیا کی ترقی میں اہم کردار ادا کیا۔ پاکستان ان کے تجربات سے استفادہ چاہتا ہے تاکہ باہمی تعاون کو مزید فروغ دیا جا سکے۔
شہباز شریف نے بتایا کہ ملاقات میں دونوں ممالک کے درمیان اقتصادی، تعلیمی اور تجارتی تعلقات بڑھانے پر بات چیت ہوئی جبکہ عالمی و علاقائی امور پر بھی تفصیلی گفتگو کی گئی۔ انہوں نے کہا کہ فلسطین اور غزہ کی صورتحال پر بھی بات ہوئی۔
انہوں نے بتایا کہ پاکستان سے 20 کروڑ ڈالر مالیت کا حلال گوشت برآمد کرنے کے فیصلے کا خیر مقدم کیا گیا ہے اور اس تجارت کو مزید وسعت دی جائے گی۔
اس موقع پر شہباز شریف نے انور ابراہیم کی کتاب “سکرپٹ” کو دونوں ممالک کے درمیان فکری اور ثقافتی پل قرار دیا اور کہا کہ قوموں کی ترقی محنت اور تجربات سے ممکن ہوتی ہے۔
دوسری جانب انور ابراہیم نے کہا کہ پاکستان کے ساتھ تعلقات 1957 سے قائم ہیں اور وقت کے ساتھ یہ تعلقات مزید مضبوط ہوئے ہیں۔ انہوں نے کہا کہ دونوں ممالک خطے کے امن و استحکام کے لیے مل کر کام کرتے رہیں گے۔
انور ابراہیم کے مطابق جنوبی ایشیا میں پائیدار امن کے لیے پاک بھارت تعلقات میں بہتری ضروری ہے، جبکہ دہشت گردی کے خاتمے کے لیے باہمی تعاون کو مزید بڑھایا جائے گا۔
