اردوورلڈکینیڈا( ویب نیوز)غزہ امن معاہدے کے تحت اسرائیل اور حماس کے درمیان قیدیوں اور یرغمالیوں کے تبادلے کا عمل آج شروع ہو گیا۔ معاہدے کے مطابق 20 اسرائیلی یرغمالیوں کے بدلے 1700 سے زائد فلسطینی قیدیوں کو رہا کیا جا رہا ہے۔
عرب میڈیا کے مطابق ریڈ کراس کی گاڑیاں یرغمالیوں اور قیدیوں کے تبادلے کے لیے غزہ کے علاقے دیرالبلاح پہنچ چکی ہیں، جبکہ فلسطینی قیدیوں کو اسرائیلی جیلوں سے بسوں کے ذریعے منتقل کیا جا رہا ہے۔
🔴 LIVE: Preparations underway for exchange of Israeli captives, Palestinian abductees under Gaza ceasefire. https://t.co/qAFmmyf5iG
— Live Stream (@video_streamz) October 13, 2025
اسرائیلی فوج نے تصدیق کی ہے کہ ابتدائی مرحلے میں 7 اسرائیلی یرغمالیوں کو رہا کر دیا گیا ہے، جنہیں ریڈ کراس کے حوالے کیا گیا۔ حماس نے بھی یرغمالیوں کی رہائی کی تصدیق کی ہے۔
ذرائع کے مطابق 1716 فلسطینی قیدیوں کو جنوبی غزہ کے النصر اسپتال منتقل کیا جائے گا، جہاں ان کا طبی معائنہ کیا جائے گا۔
ادھر خان یونس میں بھی یرغمالیوں کی رہائی کے لیے انتظامات مکمل کر لیے گئے ہیں، اور بڑی تعداد میں عوام رہائی پانے والے قیدیوں کا استقبال کرنے کے لیے جمع ہو چکے ہیں۔
غیر ملکی خبر ایجنسی کے مطابق حماس کے عسکری ونگ القسام بریگیڈ نے 20 زندہ اسرائیلی یرغمالیوں کی فہرست جاری کر دی ہے۔
دوسری جانب، مصر کے شہر شرم الشیخ میں آج غزہ امن معاہدے پر دستخط کی باضابطہ تقریب منعقد ہوگی۔ تقریب میں امریکی صدر ڈونلڈ ٹرمپ اور وزیراعظم پاکستان شہباز شریف سمیت مختلف عالمی رہنما شرکت کریں گے۔
