اردوورلڈکینیڈا( ویب نیوز)مقبوضہ جموں و کشمیر پر بھارتی قبضے کے 77 سال مکمل ہونے پر آج پاکستان، آزاد کشمیر، گلگت بلتستان اور دنیا بھر میں یومِ سیاہ بھرپور انداز میں منایا جا رہا ہے۔
کشمیری عوام سے اظہارِ یکجہتی اور بھارتی مظالم کے خلاف احتجاجی ریلیاں، واکس، سیمینارز اور تصویری نمائشوں کا اہتمام کیا گیا ہے۔
اسلام آباد میں دفترِ خارجہ سے ڈی چوک تک مرکزی یکجہتی واک نکالی جا رہی ہے، جس میں مختلف وزارتوں، طلبہ، سول سوسائٹی اور شہریوں کی بڑی تعداد شریک ہے۔ شاہراہِ دستور اور پارلیمنٹ ہاؤس کے اطراف “کشمیر بنے گا پاکستان” کے بینرز اور پوسٹرز آویزاں ہیں۔
وفاقی حکومت کی زیر نگرانی کشمیر میں بھارتی مظالم کو دنیا کے سامنے اجاگر کرنے کی خصوصی مہم جاری ہے۔ وزارتِ اطلاعات، وزارتِ خارجہ، پی ٹی اے اور اسلام آباد پولیس کی جانب سے ریلیوں اور تقاریب کے لیے انتظامات کیے گئے ہیں۔
ملک کے بڑے شہروں، جن میں کراچی، لاہور، پشاور، مظفرآباد اور گلگت شامل ہیں، یومِ سیاہ کے موقع پر احتجاجی واکس اور ریلیاں نکالی جا رہی ہیں۔ صبح 10 بجے کشمیری شہداء کی یاد میں ایک منٹ کی خاموشی اختیار کی گئی۔
مقررین نے عالمی برادری سے اپیل کی ہے کہ وہ مقبوضہ کشمیر میں انسانی حقوق کی سنگین خلاف ورزیوں کا نوٹس لے اور کشمیری عوام کو حقِ خودارادیت دلانے میں اپنا کردار ادا کرے۔
تعلیمی اداروں میں بھی یومِ سیاہ کے حوالے سے خصوصی تقاریب منعقد ہو رہی ہیں، جہاں طلبہ نے کشمیری عوام کے ساتھ اظہارِ یکجہتی کرتے ہوئے آزادی کے عزم کو دہرایا۔
آج کا دن پوری پاکستانی قوم کی جانب سے کشمیری عوام کے ساتھ عزم، اتحاد اور ایمان کی تجدید کا دن قرار دیا جا رہا ہے۔
