اردوورلڈکینیڈا( ویب نیوز)سعودی عرب رواں مالی سال پاکستان کو ایک ارب ڈالر کی آئل فیسیلٹی فراہم کرے گا اور 5 ارب ڈالر کے ٹائم ڈیپازٹس بھی رول اوور کرے گا۔ وزارت خزانہ کے حکام کے مطابق سعودی آئل فیسیلٹی کی مالیت تقریباً 290 ارب روپے کے برابر ہوگی۔ 5 ارب ڈالر کے ڈیپازٹس میں سے 2 ارب ڈالر دسمبر میں اور 3 ارب ڈالر جون 2026 میں واجب الادا ہوں گے۔

دستاویزات کے مطابق، رواں مالی سال کے پہلے تین ماہ میں پاکستان کو 85 ارب روپے سے زائد کی آئل فیسیلٹی دی گئی، جو تقریباً 30 کروڑ ڈالر کے برابر ہے۔ سعودی عرب ماہانہ بنیاد پر 10 کروڑ ڈالر کی آئل فیسیلٹی فراہم کر رہا ہے، جو پاکستانی کرنسی میں تقریباً 28 ارب 37 کروڑ روپے بنتی ہے۔

حکام نے بتایا کہ سعودی عرب نے پاکستان کو 5 ارب ڈالر کے ٹائم ڈیپازٹس 4 فیصد سالانہ شرح سود پر فراہم کیے ہیں، جو ہر سال رول اوور کیے جاتے ہیں۔ یہ فنڈز بجٹ سپورٹ کے طور پر دیے گئے ہیں اور سعودی ڈیپازٹس کی مجموعی مالیت تقریباً 1450 ارب روپے بنتی ہے۔