اردوورلڈکینیڈا( ویب نیوز)البرٹا کی حکومت نے صوبے کی تاریخ کی سب سے بڑی اساتذہ ہڑتال ختم کرنے کے لیے کینیڈین آئین کی نات وِتھ اسٹینڈنگ کلاز استعمال کرتے ہوئے اکیاون ہزار اساتذہ کو فوری طور پر اسکولوں میں واپس جانے کا حکم دے دیا ہے۔
یہ ہڑتال اکتوبر کے آغاز میں شروع ہوئی تھی جس میں ہزاروں اساتذہ نے کلاسوں کے بڑے حجم، ناکافی تنخواہوں اور مشکل کام کے حالات پر احتجاج کیا تھا۔ اگر حکومت کا بل منظور ہو گیا تو طلبہ بدھ کے روز سے دوبارہ اسکولوں میں واپس آئیں گے۔
قانونی ماہرین کے مطابق یہ اقدام اگرچہ ہڑتال ختم کر دے گا لیکن تنازع کو ختم نہیں کرے گا بلکہ آنے والے دنوں میں مزدور کشیدگی میں مزید اضافہ ہو سکتا ہے۔ ماہر روزگار وکیل پُنیت تیواری کا کہنا ہے کہ نات وِتھ اسٹینڈنگ کلاز کے استعمال سے اساتذہ کے پاس اب عدالتی چارہ جوئی کا راستہ بند ہو گیا ہے۔ ان کے مطابق اگر کوئی استاد حکومت کے حکم کے باوجود اسکول واپس نہ جائے تو اسے نوکری چھوڑنے کے مترادف سمجھا جائے گا۔
تیواری کا کہنا ہے کہ اساتذہ اب ممکنہ طور پر ورک ٹو رول یعنی محدود کام کی حکمت عملی اپنائیں گے جس میں وہ صرف اتنا کام کریں گے جتنا ان کے معاہدے میں لازم ہے۔ اس کے نتیجے میں ہم نصابی سرگرمیاں ختم ہو سکتی ہیں، کھیلوں کی ٹیمیں نہیں بن سکیں گی اور طلبہ کو اضافی مدد بھی نہیں ملے گی۔
انہوں نے کہا کہ یہی صورتحال تقریباً بیس سال پہلے بھی البرٹا میں دیکھنے میں آئی تھی جب اساتذہ بغیر کسی اطمینان کے واپس اسکول گئے تھے۔
حکومت کے اس فیصلے کے بعد اب دیگر مزدور تنظیموں کے ساتھ ٹکراؤ کا خطرہ بڑھ گیا ہے۔ صوبے کی تیس یونینوں کے اتحاد کامن فرنٹ نے پہلے ہی خبردار کیا تھا کہ اگر حکومت نے نات وِتھ اسٹینڈنگ کلاز استعمال کی تو وہ غیر معمولی ردعمل دیں گے۔
سیاسی مبصرین کا کہنا ہے کہ اگرچہ اس قانون سے فوری طور پر اسکول کھل جائیں گے مگر اس کے اثرات طویل مدتی ہوں گے اور یہ البرٹا میں مزدور سیاست کا نیا دور شروع کر سکتا ہے۔
