اردوورلڈکینیڈا( ویب نیوز)وزیراعظم شہباز شریف نے سعودی ولی عہد اور وزیرِاعظم محمد بن سلمان سے ریاض میں ملاقات کی جس میں دوطرفہ تعلقات، سرمایہ کاری کے مواقع اور معاشی تعاون کے فروغ پر تبادلہ خیال کیا گیا۔
سعودی ولی عہد نے پاکستان کے ساتھ تعلقات کو مزید مضبوط بنانے کے عزم کا اعادہ کیا، جبکہ دونوں رہنماؤں نے توانائی، تجارت اور نئے ترقیاتی منصوبوں میں شراکت بڑھانے پر اتفاق کیا۔ اس موقع پر پاکستان اور سعودی عرب کے درمیان اعلیٰ سطحی رابطے جاری رکھنے پر بھی بات چیت ہوئی۔
ملاقات ریاض میں جاری فیوچر انویسٹمنٹ انیشی ایٹو کانفرنس کے موقع پر ہوئی، جس میں دونوں ممالک کے اعلیٰ سطحی وفود شریک تھے۔ آرمی چیف جنرل سید عاصم منیر، نائب وزیراعظم و وزیرِ خارجہ سینیٹر اسحاق ڈار، وزیرِ خزانہ محمد اورنگزیب اور وزیرِ اطلاعات عطاء اللہ تارڑ بھی وزیراعظم کے ہمراہ موجود تھے۔
وزیراعظم شہباز شریف سعودی ولی عہد محمد بن سلمان کی خصوصی دعوت پر ریاض پہنچے، جہاں کنگ خالد انٹرنیشنل ایئرپورٹ پر ریاض کے نائب گورنر شہزادہ محمد بن عبدالرحمٰن، سعودی سفیر نواف بن سعید المالکی اور پاکستانی سفیر احمد فاروق نے ان کا استقبال کیا۔
وزیراعظم ریاض میں منعقدہ فیوچر انویسٹمنٹ انیشی ایٹو کی نویں کانفرنس میں پاکستان کی نمائندگی کر رہے ہیں، جس میں عالمی سرمایہ کاری کے رحجانات اور اقتصادی تعاون کے نئے مواقع پر گفتگو ہو رہی ہے۔
