اردو ورلڈ کینیڈا ( ویب نیوز ) امریکہ کی جانب سے درآمد شدہ ٹرکوں اور بسوں پر بھاری ٹیرف نافذ کیے جانے کے بعد کینیڈا کی آٹو اور ہیوی وہیکل انڈسٹری ایک نازک دور سے گزر رہی ہے۔
25 فیصد ٹیرف ٹرکوں اور 10 فیصد ٹیرف بسوں پر عائد ہونے کے بعد نہ صرف برآمدات متاثر ہو رہی ہیں بلکہ سینکڑوں ملازمین اپنی نوکریوں سے محروم ہو چکے ہیں۔ یہ فیصلہ صرف تجارتی پالیسی نہیں بلکہ ایک ایسا معاشی دھچکا ہے جس کی لہریں کینیڈا کے صنعتی شہروں اور چھوٹے مینوفیکچرنگ ٹاؤنز تک محسوس کی جا رہی ہیں۔
ڈونلڈ ٹرمپ نے اس اقدام کو قومی سلامتی کے نام پر جائز قرار دیا ہے، مگر یہ دلیل دراصل امریکی پروٹیکشن ازم کی نئی شکل ہے جو "امریکہ فرسٹ” پالیسیاں آگے بڑھانے کے لیے استعمال ہو رہی ہے۔ کینیڈا اور امریکہ کے درمیان دہائیوں سے موجود صنعتی ربط، مشترکہ لاجسٹک چین اور USMCA معاہدہ اس فیصلے سے کمزور ہو رہا ہے۔ خاص طور پر یہ شرط کہ کینیڈا کے بنائے گئے ٹرکوں میں شامل غیر امریکی پرزوں پر بھی ٹیرف لیا جائے گا، بین الاقوامی تجارت کے بنیادی اصولوں کے خلاف ہے۔
کینیڈین کمپنیاں اب ایسی صورتِ حال میں کھڑی ہیں جہاں نہ لابنگ کارگر ہو رہی ہے، نہ پیداوار کم کرنے سے کوئی حل نکل رہا ہے۔ ایڈیسن موٹرز کے مطابق ایک ٹرک پر ٹیرف سے ایک لاکھ ڈالر تک اضافی لاگت آئے گی، جو براہِ راست صارف یا کمپنی کی بقا پر اثر انداز ہوگی۔ دوسری طرف کیوبیک میں Paccar کمپنی کی جانب سے سیکڑوں ملازمین کی برطرفی یہ ثابت کرتی ہے کہ مسئلہ محض نظریاتی یا سیاسی نہیں، بلکہ عملی اور معاشی بحران بن چکا ہے۔
یہ بات طے ہے کہ یہ ٹیرف طویل مدتی تجارتی دباؤ پیدا کریں گے، اور اگر کینیڈا نے صنعتی پالیسی، سبسڈی اور نئی داخلی مارکیٹ حکمتِ عملی نہ اپنائی تو یہ صنعت سکڑ کر محدود ہو سکتی ہے۔ ماہرین کے مطابق “Buy Canadian” جیسے ماڈل پر عمل درآمد ہی اس وقت واحد راستہ ہے، مگر اس کے لیے حکومت، صنعت اور سرمایہ کاروں کو مشترکہ حکمت عملی اختیار کرنا ہوگی۔ ورنہ وہ وقت دور نہیں جب کینیڈا صرف درآمد کنندہ ملک بن کر رہ جائے گا اور اس کی صنعتی خودمختاری کمزور پڑ جائے گی۔
