اردوورلڈکینیڈا( ویب نیوز)اوٹاوا پولیس سروس کے سابق ڈپٹی چیف اُدے جسوال نے چودہ سال پرانے جنسی حملے کے مقدمے میں کم درجے کے الزام کو قبول کرتے ہوئے قصوروار قرار دینے کی درخواست منظور کرالی ہے۔
یہ مقدمہ 2011 کے ایک واقعے سے متعلق تھا جب جسوال اوٹاوا پولیس میں ایکٹنگ انسپکٹر کے طور پر خدمات انجام دے رہے تھے۔ ان پر الزام تھا کہ انہوں نے ڈیوٹی کے دوران ایک خاتون ساتھی کے ساتھ دفتر میں شراب نوشی کے بعد جنسی عمل کیا۔ عدالت میں پیش کیے گئے متفقہ بیان کے مطابق دونوں نے کچھ وقت اکٹھے گزارا اور اس دوران جسمانی تعلق قائم ہوا۔ اُدے جسوال نے مؤقف اختیار کیا کہ یہ تعلق رضامندی سے قائم ہوا تھا۔
اوٹاوا پولیس نے یہ واقعہ مارچ 2023 میں اسپیشل انویسٹی گیشنز یونٹ (ایس آئی یو) کو رپورٹ کیا تھا جس کے بعد گزشتہ سال اُن پر جنسی حملے کا باضابطہ مقدمہ دائر کیا گیا۔ پیر کو اونٹاریو سپیریئر کورٹ کے جج رابرٹ ہارٹن نے کراؤن اور دفاع کے درمیان طے پانے والے معاہدے کو قبول کرتے ہوئے اُدے جسوال کو ’’اعتماد کے غلط استعمال‘‘ (breach of trust) کے جرم میں چھ ماہ کی مشروط سزا سنائی۔ سزا کے تحت انہیں ساٹھ دن نظر بندی یعنی گھر میں قید کی حالت میں گزارنے ہوں گے۔
عدالت میں خطاب کرتے ہوئے اُدے جسوال نے کہا کہ وہ معاملے کی سنگینی کو سمجھتے ہیں اور اپنی ذمہ داری قبول کرتے ہیں۔ جج نے کہا کہ یہ معاہدہ نرمی کی حد کے قریب ہے، تاہم حالات کے پیشِ نظر اسے قبول کیا جا رہا ہے۔ کراؤن وکیل نے عدالت کو بتایا کہ اس مقدمے میں متاثرہ خاتون کا بیانِ اثرات (victim impact statement) ریکارڈ میں شامل نہیں کیا جائے گا۔ فیصلے کے اعلان کے وقت خاتون عدالت میں موجود تھیں اور واضح طور پر جذباتی کیفیت میں تھیں۔
اُدے جسوال نے 2022 میں اوٹاوا پولیس سروس سے استعفیٰ دے دیا تھا۔ ان کے خلاف اُس وقت بھی جنسی ہراسانی کے الزامات سامنے آئے تھے، جن میں ایک خاتون سویلین ملازمہ نے 2021 میں اپنی کہانی سی بی سی کو بتائی تھی۔
