اردوورلڈ کینیڈا( ویب نیوز)افغانستان سے خیبر پختونخوا میں منشیات کی اسمگلنگ کے ایک بڑے نیٹ ورک کا انکشاف ہوا ہے، جو نہ صرف غیر قانونی تجارت میں ملوث ہے بلکہ دہشت گرد گروہوں کو مالی مدد بھی فراہم کر رہا ہے۔

ذرائع کے مطابق افغانستان سے بھاری مقدار میں منشیات خیبر پختونخوا کے قبائلی اضلاع، خصوصاً وادی تیراہ، میں اسمگل کی جا رہی ہیں۔ اس نیٹ ورک میں ڈرگ مافیا اور دہشت گرد تنظیمیں، جنہیں خوارج کہا جاتا ہے، گٹھ جوڑ کے ساتھ سرگرم ہیں۔

ذرائع نے بتایا کہ وادی تیراہ اور خیبر کے مختلف علاقوں میں تقریباً 12 ہزار ایکڑ رقبے پر منشیات کی کاشت ہو رہی ہے، جس سے 18 سے 25 لاکھ امریکی ڈالر تک کا غیر قانونی منافع حاصل کیا جاتا ہے۔ اس رقم کا ایک نمایاں حصہ خوارج کو دیا جاتا ہے، جو اسے دہشت گردی کی کارروائیوں اور اپنے نیٹ ورک کے تحفظ کے لیے استعمال کرتے ہیں۔

مزید انکشاف ہوا کہ اس غیر قانونی کاروبار کو بعض سیاسی شخصیات کی پشت پناہی حاصل ہے، جس کے باعث سیکیورٹی فورسز کو وادی تیراہ میں آپریشنز کے دوران سخت مزاحمت کا سامنا کرنا پڑتا ہے۔ ذرائع کے مطابق منشیات، دہشت گردی اور سیاسی مفادات کا یہ گٹھ جوڑ علاقے میں بدامنی کا بنیادی سبب بن چکا ہے۔

رپورٹ کے مطابق رواں سال خیبر ڈسٹرکٹ میں دہشت گردی کے مختلف واقعات میں 198 افراد شہید یا زخمی ہوئے، اور ان حملوں کی ذمہ داری اسی “پولیٹیکل-ٹیرر کرائم نیکسس” پر عائد کی جا رہی ہے۔