اردوورلڈکینیڈا( ویب نیوز)انسداد دہشت گردی عدالت نے 26 نومبر کے احتجاج کے مقدمے میں علیمہ خان کے خلاف دسویں بار ناقابل ضمانت وارنٹ گرفتاری جاری کر دیے ہیں۔ مقدمے کی سماعت جج امجد علی شاہ نے کی۔ عدالت نے علیمہ خان کی اسلام آباد اور پنجاب میں ملکیتی پراپرٹی کی تفصیلات دوبارہ طلب کر لیں اور بینک اکاؤنٹس منجمند نہ کرنے پر دو بینک مینجرز کو شوکاز نوٹس جاری کر دیا۔
عدالت نے علیمہ خان کو گرفتار کر کے 17 نومبر کو پیش کرنے کا حکم دیا جبکہ سماعت ملتوی کر دی گئی۔ آج علیمہ خان عدالت میں پیش نہیں ہوئیں، تاہم مقدمے کے دیگر 10 ملزمان پیش ہوئے اور بعد از سماعت روانہ ہو گئے۔
انسداد دہشت گردی عدالت نے پہلے بھی علیمہ خان کے خلاف نو وارنٹ گرفتاری جاری کیے تھے، اور آج کے وارنٹ کے ساتھ یہ تعداد دس تک پہنچ گئی۔ عدالت نے اس مقدمے میں پانچ گواہان کو بھی طلب کیا ہے۔
وکیل صفائی فیصل ملک نے کہا کہ علیمہ خان آج بھی پیش نہیں ہوں گی اور انہوں نے مقدمے کی دہشت گردی کی دفعات کو عدالت میں چیلنج کیا ہوا ہے۔ وکیل کا کہنا تھا کہ یہ کیس دہشت گردی کی دفعات کے تحت نہیں بنتا، اور مقدمے کی نوعیت مختلف ہے۔
ذرائع کے مطابق عدالت کی طرف سے جاری وارنٹ گرفتاری کے بعد علیمہ خان کے گرفتار ہونے اور آئندہ سماعت میں پیش ہونے کا امکان ہے، جبکہ بینک اکاؤنٹس اور پراپرٹی کی تفصیلات کی طلب سے مقدمے کی تحقیقات میں اہم پیش رفت متوقع ہے
