اردوورلڈکینیڈا( ویب نیوز)خیبرپختونخوا میں سیکیورٹی فورسز نے مختلف کارروائیوں کے دوران کل 30 دہشتگرد ہلاک، 5 زخمی اور ایک سہولت کار گرفتار کر لیا۔ یہ کارروائیاں صوبے کے مختلف اضلاع میں انسداد دہشتگردی کی کوششوں کے تحت کی گئیں۔
بنوں ریجن کے مختلف علاقوں میں پولیس اور سی ٹی ڈی کی مشترکہ کارروائیوں میں اہم دہشتگرد کمانڈرز سمیت 17 خوارج ہلاک ہوئے، جبکہ متعدد دیگر زخمی ہو گئے۔ سی پی او کے مطابق شیری خیل اور پکہ پہاڑ خیل میں 10 دہشتگرد مارے گئے اور 5 زخمی ہوئے، ایک سہولت کار بھی گرفتار کیا گیا۔ ہلاک ہونے والے دہشتگردوں میں نیاز علی، عبداللّٰہ عرف شپونکوئی اور رسول عرف اریانہ شامل ہیں۔
اسی طرح نصر خیل میں ایک انتہائی مطلوب دہشتگرد ہلاک ہوا، جبکہ ڈومیل کے علاقے میں 6 دیگر خوارج مارے گئے۔ آئی جی خیبرپختونخوا ذوالفقار حمید نے کہا کہ دہشتگردوں کا ان کی خفیہ پناہ گاہوں تک پیچھا کیا جائے گا اور آخری دہشتگرد کے خاتمے تک آپریشنز جاری رہیں گے۔
پاک فوج کے شعبہ تعلقات عامہ (آئی ایس پی آر) کے مطابق صوبے میں امن دشمنوں کے خلاف تین علیحدہ کارروائیوں میں 13 مزید خوارج ہلاک ہوئے۔ لکی مروت میں دو ہائی پروفائل کمانڈرز سمیت 10 دہشتگرد مارے گئے جبکہ ڈیرہ اسماعیل خان میں 3 خوارج کا خاتمہ کیا گیا۔
سیکیورٹی فورسز کے مطابق ان کارروائیوں کا مقصد عوام کو دہشتگردی کے خطرے سے محفوظ بنانا اور صوبے میں امن قائم رکھنا ہے۔ فورسز نے عوام سے اپیل کی کہ وہ مشکوک سرگرمیوں کی اطلاع فوری طور پر متعلقہ حکام کو دیں۔
یہ آپریشنز صوبے میں انسداد دہشتگردی کے عزم کو ظاہر کرتے ہیں اور سیکیورٹی ادارے دہشتگردوں کے خلاف مسلسل کارروائیوں کے لیے تیار ہیں۔
