اردوورلڈکینیڈا( ویب نیوز)پشاور صدر میں فیڈرل کانسٹیبلری ہیڈکوارٹر کے گیٹ پر خودکش دھماکے میں جوابی کارروائی کے نتیجے میں دو دہشت گرد ہلاک اور تین اہلکار شہید جبکہ دو زخمی ہوئے ہیں۔
سیکورٹی ذرائع کے مطابق حملہ آوروں نے پہلے ہیڈکوارٹر کے گیٹ پر خودکش دھماکا کیا اور پھر دو دیگر دہشت گرد اندر داخل ہونے کی کوشش کی، جنہیں سیکیورٹی فورسز نے مار دیا۔ فائرنگ کی آواز رک گئی ہے اور علاقے کی کلیئرنس جاری ہے۔
آئی جی کے پی ذوالفقار حمید نے بتایا کہ سیکیورٹی انتظامات کی وجہ سے حملہ آور ہیڈکوارٹر کے اندر نہیں پہنچ سکے، ورنہ بڑا نقصان ہو سکتا تھا۔ انہوں نے کہا کہ ایک خودکش حملہ آور نے پہلے گیٹ پر دھماکا کیا اور دوسرا بھی ایف سی کی فائرنگ سے مارا گیا۔
سی سی پی او پشاور کے مطابق سیکیورٹی فورسز آپریشن میں مصروف ہیں اور شواہد اکٹھے ہونے کے بعد دھماکے کی نوعیت کا تعین کیا جائے گا۔دھماکے کے بعد خیبر ٹیچنگ اسپتال میں ایمرجنسی نافذ کی گئی، زخمی اہلکار کو اسپتال منتقل کیا گیا اور حالت تسلی بخش بتائی گئی ہے۔
سیکیورٹی فورسز، فیڈرل ریزرو پولیس اور دیگر ادارے جائے وقوعہ پر موجود ہیں، علاقے کو گھیرے میں لے کر راستے بند کر دیے گئے ہیں۔ اس سے قبل بھی اسی چوک پر ایف سی کمانڈر کو خودکش دھماکے کا نشانہ بنایا گیا تھا۔
