اردوورلڈکینیڈا( ویب نیوز)خیبرپختونخوا کے وزیراعلیٰ سہیل آفریدی نے وزیراعظم شہباز شریف کو خط لکھ کر چشمہ رائٹ بینک کینال (CRBC) منصوبے میں تاخیر پر تشویش کا اظہار کیا ہے۔ وزیراعلیٰ کے مطابق یہ منصوبہ 35 سال سے شروع نہیں ہو سکا، جس سے عوام میں حکومت پر اعتماد کمزور ہو رہا ہے۔
وزیراعلیٰ نے خط میں بتایا کہ ملک کے چاروں صوبوں میں جاری آبپاشی منصوبوں میں صرف CRBC کینال پر پیش رفت نہیں ہوئی، جبکہ دیگر صوبوں کے منصوبے 1991 کے واٹر اپورٹمنٹ ایکارڈ کے تحت مکمل ہو چکے ہیں۔ انہوں نے کہا کہ CCI نے منصوبے کی مالی معاونت 65 فیصد وفاق اور 35 فیصد صوبے کی ذمہ داری قرار دی تھی، لیکن وفاقی حکومت نے خیبرپختونخوا کے منصوبے کو غیر فعال رکھا۔
خط میں کہا گیا کہ ایکنک نے 2022 میں 189 ارب روپے کے منصوبے کی منظوری دی، لیکن منصوبہ شروع نہیں ہو سکا۔ واپڈا پروکیورمنٹ اور کوالیفکیشن کے عمل میں مسلسل تاخیر کر رہا ہے، جبکہ صوبائی حکومت نے زمین کے حصول کے لیے 2 ارب روپے جاری کیے اور مزید 5 ارب روپے مختص کیے ہیں۔ تاہم، وفاق نے صرف 100 ملین روپے مختص کیے، جو منصوبے کے لیے ناکافی اور غیر سنجیدہ اقدام ہے۔
وزیراعلیٰ نے واضح کیا کہ چشمہ رائٹ بینک کینال منصوبہ دہشت گردی سے متاثرہ علاقوں کے لیے بہت اہم ہے اور اس سے تقریباً 38 ارب روپے کا معاشی فائدہ حاصل ہو سکتا ہے۔ منصوبے کے مکمل ہونے سے 2.8 لاکھ ایکڑ سے زیادہ زمین سیراب ہو گی، اور اس میں تاخیر عوام میں اعتماد کے بحران کا سبب بن رہی ہے۔
خط میں وزیر اعلیٰ نے وفاق سے مطالبہ کیا ہے کہ منصوبے کو جلد از جلد شروع کیا جائے تاکہ صوبے کے عوام کو اس کے اقتصادی اور سماجی فوائد فراہم کیے جا سکیں۔
