اردوورلڈکینیڈا( ویب نیوز)وزارتِ دفاع نے فیلڈ مارشل سید عاصم منیر کی چیف آف ڈیفنس فورسز کے عہدے پر تقرری اور ایئر چیف مارشل ظہیر احمد بابر سدھو کی مدتِ ملازمت میں توسیع سے متعلق باضابطہ نوٹیفکیشن جاری کر د ئیے ہیں۔

اس سے ایک روز قبل صدرِ مملکت آصف علی زرداری نے وزیرِ اعظم کی سفارش پر فیلڈ مارشل عاصم منیر کی بطور چیف آف ڈیفنس فورسز تعیناتی کی منظوری دیتے ہوئے متعلقہ حکم نامہ جاری کیا تھا۔ صدر کی منظوری کے بعد اب وزارتِ دفاع نے بھی ان کی تقرری کا سرکاری نوٹیفکیشن جاری کر دیا ہے۔دستاویز کے مطابق فیلڈ مارشل عاصم منیر آئندہ پانچ برس تک چیف آف ڈیفنس فورسز کے طور پر خدمات انجام دیں گے۔

اسی طرح وزارتِ دفاع نے پاک فضائیہ کے سربراہ ایئر چیف مارشل ظہیر احمد بابر سدھو کی مدتِ ملازمت میں دو سال اضافے کا نوٹیفکیشن بھی جاری کیا ہے۔ صدر آصف علی زرداری پہلے ہی اُن کی توسیع کی منظوری دے چکے تھے۔ اعلامیے کے مطابق ایئر چیف کی توسیع شدہ مدت 19 مارچ 2026 سے شروع ہوگی۔