اردوورلڈکینیڈا( ویب نیوز)وزیراعظم محمد شہباز شریف نے کہا ہے کہ، ان شاء اللہ، وہ وقت زیادہ دور نہیں جب پاکستان اپنے قرضوں سے مکمل طور پر آزاد ہو کر معاشی طور پر خود کفیل بن جائے گا۔
وزیراعظم نے آئی ایم ایف کے جاری پروگرام کے تحت حکومت کی معاشی اصلاحات اور اقدامات کے مؤثر نفاذ کو سراہا اور کہا کہ یہ مالی اجراء حکومت کی معاشی ٹیم کی محنت کا منہ بولتا ثبوت ہے۔ انہوں نے معاشی ترقی کی راہ ہموار کرنے میں چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر کی معاونت کو کلیدی قرار دیا۔
وزیراعظم نے مزید کہا کہ آئی ایم ایف کی جانب سے پاکستان میں اصلاحات کے مؤثر نفاذ پر اظہار اطمینان وزیر خزانہ محمد اورنگزیب اور ان کی ٹیم کی محنت کو تسلیم کرنے کے مترادف ہے۔ موجودہ مالی اجراء اس بات کا ثبوت ہے کہ پاکستان معاشی استحکام اور ترقی کے لیے ضروری اقدامات پر گامزن ہے۔
انہوں نے کہا کہ ملک کو ڈیفالٹ کے خطرے سے نکالنا ایک کٹھن مرحلہ تھا جس میں سب نے قربانی دی۔ سیاسی جماعتوں نے سیاسی مفادات سے بالا تر ہو کر تعاون کیا اور عوام نے معاشی مشکلات برداشت کر کے ممکن کو ممکن بنایا۔
وزیراعظم نے کہا کہ اللہ کے فضل سے پاکستان کی معاشی اصلاحات اور ڈیجیٹائزیشن کامیاب مثال کے طور پر دنیا کے سامنے ہیں اور پاکستان کی معاشی ترقی کا خواب جلد حقیقت کا روپ لے گا۔
شہباز شریف نے مزید کہا کہ استحکام کے بعد ترقی کی راہ میں مزید محنت کی ضرورت ہے اور بطور وزیراعظم وہ پاکستانی عوام کی خوشحالی اور ملک کی بیرونی قرضوں سے مکمل آزادی تک کام جاری رکھیں گے۔
