اردو ورلڈ کینیڈا ( ویب نیوز ) صحافیوں کے عالمی تحفظ کی تنظیم رپورٹرز ود آؤٹ بارڈرز (RSF) نے اپنی سالانہ رپورٹ میں انکشاف کیا ہے کہ رواں سال دنیا بھر میں قتل ہونے والے تقریباً نصف صحافیوں کی ہلاکت کا ذمہ دار اسرائیل ہے۔
رپورٹ کے مطابق سال 2025 میں دنیا بھر میں قتل ہونے والے 67 صحافیوں میں سے 29 صحافیوں کو اسرائیلی فوج نے غزہ میں بے دردی سے قتل کیا ۔رپورٹ میں کہا گیا ہے کہ اسرائیل اس وقت دنیا میں صحافیوں کا سب سے بڑا دشمن بن چکا ہے، جہاں غزہ میں جنگ کی کوریج کرنے والے میڈیا نمائندوں کو دانستہ طور پر نشانہ بنایا جا رہا ہے۔ عالمی ادارے کے مطابق صحافیوں پر حملے محض حادثات نہیں بلکہ باقاعدہ حکمتِ عملی کے تحت کیے جا رہے ہیں تاکہ زمینی حقائق کو دنیا کے سامنے آنے سے روکا جا سکے۔رپورٹرز ود آؤٹ بارڈرز کی رپورٹ کے مطابق خان یونس میں 25 اگست کو ہونے والا اسرائیلی فوج کا ڈبل ٹریپ حملہ صحافیوں کے خلاف رواں سال کا بدترین حملہ** تھا، جس میں ایک ہی کارروائی کے دوران پانچ صحافی شہید ہو گئے۔ اس حملے کو عالمی سطح پر شدید مذمت کا سامنا کرنا پڑا، تاہم اسرائیل کی جانب سے کسی قسم کی شفاف تحقیقات یا ذمہ داری قبول نہیں کی گئی۔
رپورٹ میں مزید بتایا گیا ہے کہ غزہ جنگ کے آغاز سے اب تک تقریباً 220 صحافی اسرائیلی حملوں میں شہید ہو چکے ہیں ، جو کسی بھی جدید جنگ میں صحافیوں کی ہلاکتوں کی سب سے بڑی تعداد تصور کی جا رہی ہے۔ ان شہادتوں میں بڑی تعداد مقامی فلسطینی صحافیوں کی ہے جو محدود وسائل کے باوجود عالمی میڈیا کو زمینی حقائق فراہم کر رہے تھے۔عالمی صحافتی تنظیم کا کہنا ہے کہ اسرائیل کی جانب سے صحافیوں کو نشانہ بنانا جنگی جرم کے زمرے میں آتا ہے اور عالمی برادری کی خاموشی ان جرائم کو مزید تقویت دے رہی ہے۔ تنظیم نے اقوامِ متحدہ، عالمی عدالتِ انصاف اور انسانی حقوق کے اداروں سے مطالبہ کیا ہے کہ اسرائیل کے خلاف فوری اور شفاف تحقیقات کا آغاز کیا جائے۔ماہرین کے مطابق غزہ میں صحافیوں کی ہلاکتوں کا مقصد سچ کو دبانا اور مظالم کی حقیقت کو دنیا سے چھپانا ہے، تاہم اس کے باوجود فلسطینی صحافی اپنی جانوں کی پروا کیے بغیر حقائق عالمی ضمیر تک پہنچانے میں مصروف ہیں۔
