اردوورلڈکینیڈا( ویب نیوز)پریمیئر ڈینیئل اسمتھ البرٹا کی دوسری ایسی صوبائی سربراہ بن گئی ہیں جنہیں عوام کی طرف سے اپنے ہی حلقے سے ہٹانے کی باضابطہ کوشش کا سامنا ہے۔ تقریباً 90 سال بعد پہلی مرتبہ کسی موجودہ پریمیئر کے خلاف اس نوعیت کی دستخطی تحریک شروع کی گئی ہے۔ بدھ کے روز ایلیکشنز البرٹا نے سمتھ اور ان کی یونائیٹڈ کنزرویٹو پارٹی (UCP) کے مزید دو ارکان کے خلاف درخواستوں کی منظوری دے کر باضابطہ مہم کا آغاز کر دیا۔
UCP کی 47 رکنی کاکس میں سے 20 ارکان اس وقت عوامی دستخطی مہم کا سامنا کر رہے ہیں، جب کہ اپوزیشن NDP کی رکن Amanda Chapman کے خلاف بھی یہی عمل شروع ہو چکا ہے۔
سمتھ کے حلقے Brooks–Medicine Hat میں یہ مہم ہیثر وین اسنک کی جانب سے چلائی جا رہی ہے، جنہیں قانونی عمل آگے بڑھانے کے لیے تقریباً 12 ہزار دستخط درکار ہیں۔ وین اسنک کا کہنا ہے کہ پریمیئر سمتھ پالیسی سازی میں نہ عوام کی سنتی ہیں اور نہ ہی ماہرین سے مناسب مشورہ کرتی ہیں۔ ان کے مطابق سمتھ عوامی خدمات کو کمزور کر کے نجکاری کو فروغ دے رہی ہیں، اس لیے وہ اب عوام کی نمائندگی کی اہل نہیں رہیں۔
پریمیئر اسمتھ نے ان الزامات کو مسترد کرتے ہوئے کہا کہ وہ باقاعدگی سے عوام سے ملتی ہیں، ٹاؤن ہال سیشن کرتی ہیں اور حلقے کے لوگوں کی رائے کو حکومتی فیصلوں میں شامل کرتی ہیں۔ ان کا کہنا ہے کہ وہ اپنے حلقے کی خدمت پر فخر محسوس کرتی ہیں۔
یہ بھی پڑھیں :یونائیٹڈ کنزرویٹو پارٹی کوکسی صورت علیحدگی پسندجماعت قرار نہیں دیا جا سکتا،ڈینیئل اسمتھ
بدھ ہی کے روز صوبائی ٹیکنالوجی کے وزیر نیٹ گلوبش اور ماحولیات کی وزیر ربیکا شولز کے خلاف بھی دستخطی مہم کی منظوری دے دی گئی۔ ان کے خلاف درخواست گزاروں نے مؤقف اختیار کیا کہ دونوں نے عوامی خدشات کو نظر انداز کیا، جبکہ دونوں وزراء کا کہنا ہے کہ وہ باقاعدہ رابطے میں رہتے ہوئے اپنے حلقوں کے لیے نتائج دے رہے ہیں۔
پریمیئر سمتھ کی صورتحال تاریخی طور پر 1930 کی دہائی کے سوشل کریڈٹ رہنما ولیم ایبرہارٹ سے مشابہت رکھتی ہے، جو عوامی دستخطی عمل کا سامنا کرنے والے البرٹا کے پہلے پریمیئر تھے۔ دلچسپ بات یہ ہے کہ وہی قانون جو انہوں نے عوامی احتساب کے لیے متعارف کرایا تھا، ایک سال بعد ان کے خلاف استعمال ہوا۔
موجودہ ریکال قانون 2021 میں UCP حکومت کے دور میں متعارف ہوا، اور رواں سال سمتھ نے اس قانون کو مزید آسان بنا دیا تاکہ شہری دستخطوں کے ذریعے اس عمل کو آگے بڑھا سکیں۔ تاہم سابق پریمیئر جیسن کینی اور موجودہ UCP قیادت کا کہنا ہے کہ اس قانون کا مقصد اخلاقی بے ضابطگیوں جیسے سنگین واقعات پر کارروائی ہے، نہ کہ عام پالیسی اختلافات پر۔پریمیئر سمتھ نے یہ خدشہ بھی ظاہر کیا ہے کہ ان کے خلاف یہ اقدامات شاید بیرونی گروہوں یا یونینز کے ذریعے منظم کیے جا رہے ہوں، تاہم البرٹا فیڈریشن آف لیبر نے اس الزام کی تردید کی ہے۔
دستخطی عمل نہایت سخت ہے: تین ماہ کے اندر حلقے میں گزشتہ انتخابات میں ڈالے گئے ووٹوں کے 60 فیصد کے برابر دستخط جمع کرنا لازم ہے۔ کامیابی کی صورت میں عوامی ووٹ کرایا جاتا ہے جس میں فیصلہ کیا جاتا ہے کہ متعلقہ رکن اپنی نشست برقرار رکھ سکے گا یا نہیں۔ ناکامی کی صورت میں ضمنی انتخاب ہوتا ہے۔اگلے صوبائی انتخابات 18 اکتوبر 2027 کو مقرر ہیں، اس لیے آنے والا دور البرٹا کی سیاست میں خاصا ہلچل پیدا کر سکتا ہے۔
