اردوورلڈکینیڈا( ویب نیوز)البرٹا بھر میں کئی ماہ تک عوامی مشاورت کے بعد، البرٹا نیکسٹ پینل نے سات سفارشات پر مشتمل رپورٹ جاری کی ہے، جن کا مقصد متحدہ کینیڈا کے اندر رہتے ہوئے صوبے کی خودمختاری کو مضبوط بنانا ہے۔پینل کی رپورٹ، جو جمعے کے روز پیش کی گئی، میں ایسے متعدد اقدامات کی نشاندہی کی گئی ہے جن کے ذریعے صوبائی حکومت پنشن، پولیسنگ اور آئینی اصلاحات سمیت مختلف شعبوں میں صوبائی کنٹرول کو وسعت دے سکتی ہے۔
اہم سفارشات میں آئندہ بیلٹ پر دو ریفرنڈم سوالات شامل کرنے کی تجویز بھی شامل ہے۔ پہلے سوال میں البرٹنز سے پوچھا جائے گا کہ آیا صوبائی حکومت کو امیگریشن پر زیادہ اختیار حاصل کرنا چاہیے یا نہیں۔
دوسرا سوال اس بات کی منظوری سے متعلق ہوگا کہ آیا البرٹا دیگر صوبوں کے ساتھ مل کر آئینی ترامیم پر تعاون کرے، تاکہ صوبائی دائرہ اختیار کا تحفظ کیا جا سکے۔ مجوزہ ترامیم میں وفاقی مداخلت سے صوبائی اختیارات کو محفوظ بنانا، وفاقی پروگراموں سے دستبرداری کے باوجود فنڈنگ برقرار رکھنے کا حق، صوبوں کو اپنے کنگز بینچ اور کورٹ آف اپیل کے جج مقرر کرنے کی اجازت دینا، اور وفاقی سینیٹ کا خاتمہ شامل ہے۔
رپورٹ کے اجراء کے فوراً بعد اپوزیشن این ڈی پی کی جانب سے سخت تنقید سامنے آئی ہے۔ پارٹی کے رہنما نہید نینشی کا کہنا ہے کہ ان سفارشات تک پہنچنے کا پورا عمل ابتدا ہی سے ناقص تھا اور کئی تجاویز صوبے کے لیے سنگین خطرات رکھتی ہیں۔
نینشی کے ایک بیان میں کہا گیااس حکومت نے ٹیکس دہندگان کے لاکھوں ڈالر ایک ایسے جانبدار عمل پر خرچ کیے جس میں البرٹنز کو بار بار خاموش کرایا گیا یا بے عزتی کا نشانہ بنایا گیا، اگر وہ پہلے سے طے شدہ نتائج سے اختلاف کرتے تھے۔”
پینل کی رپورٹ میں یہ سفارش بھی کی گئی ہے کہ صوبائی حکومت البرٹنز کو ممکنہ البرٹا پنشن پلان (اے پی پی) کے حوالے سے ایک تفصیلی تجویز فراہم کرے، جس میں فوائد، انتظامی ڈھانچہ، چندے کی شرح اور نفاذ کا منصوبہ شامل ہو۔
رپورٹ کے مطابق کینیڈا پنشن پلان سے علیحدگی پر ریفرنڈم صرف اسی صورت میں کرایا جانا چاہیے جب یہ تجویز عوام کے سامنے پیش کر دی جائے۔
اس کے علاوہ، رپورٹ میں البرٹا کی جانب سے ذاتی آمدنی ٹیکس خود جمع کرنے کے مکمل لاگت اور فوائد کے تجزیے کا مطالبہ کیا گیا ہے۔ تاہم پینل نے اس مرحلے پر ریفرنڈم کرانے کے خلاف مشورہ دیا ہے۔
پینل نے البرٹا پر زور دیا ہے کہ وہ دیگر صوبوں اور وفاقی حکومت کے ساتھ مل کر ایکوالائزیشن اور وسیع تر مالیاتی وفاقیت (فِسکل فیڈرلزم) میں اصلاحات کے لیے قائدانہ کردار ادا کرے۔
رپورٹ میں دیہی اور چھوٹے شہروں میں آر سی ایم پی کی جگہ البرٹا پولیس سروس (اے پی ایس) کے قیام پر کام جاری رکھنے کی بھی سفارش کی گئی ہے۔ اس منتقلی کے تحت کمیونٹی پولیسنگ کی ذمہ داریاں اے پی ایس اور بلدیاتی پولیس فورسز کو منتقل ہو جائیں گی۔
نینشی نے اس تجویز پر بھی تنقید کرتے ہوئے کہا،یو سی پی البرٹا کو آر سی ایم پی سے نکالنا چاہتی ہے، بزرگوں کی محنت سے کمائی گئی پنشن پر کنٹرول حاصل کرنا چاہتی ہے، اور امیگریشن کا اختیار سنبھالنا چاہتی ہے — یہ سب محض اپنے سیاسی مفاد کے لیے۔”
البرٹا نیکسٹ پینل نے ایڈمنٹن، کیلگری، ریڈ ڈئیر، فورٹ مکمرے اور لیتھ برج سمیت 10 کمیونٹیز میں عوامی اجلاس منعقد کیے، جبکہ ایک آن لائن ٹاؤن ہال بھی ہوا۔ ان مشاورتوں میں 5,000 سے زائد البرٹنز نے حصہ لیا۔یہ پینل رواں سال کے آغاز میں وزیرِاعظم مارک کارنی کی وفاقی انتخابی کامیابی کے بعد تشکیل دیا گیا تھا۔
وزیرِاعلیٰ ڈینیئل اسمتھ نے اس عمل کو اوٹاوا کے ساتھ البرٹا کے تعلقات کا ازسرِنو جائزہ لینے کا موقع قرار دیا۔ اس عمل میں چھ بڑی تجاویز کا جائزہ لیا گیا، جن میں امیگریشن پر صوبائی کنٹرول میں اضافہ، البرٹا پنشن پلان کا قیام اور صوبائی پولیس سروس کی تشکیل شامل ہیں۔
