فلسطینی خبر ایجنسی کے مطابق فضائی حملوں میں شہری آبادی، جن میں خواتین اور بچے بھی شامل ہیں، نشانہ بنی۔ خاص طور پر جنوبی غزہ کے علاقے خان یونس میں حملے میں چار افراد ہلاک ہوئے، جبکہ غزہ شہر میں بے گھر افراد کے تربیتی مرکز پر حملے میں چھ افراد جان کی بازی ہار گئے۔فلسطینی حکام کے مطابق 10 اکتوبر کو طے پانے والے جنگ بندی معاہدے کے باوجود اسرائیل کی کارروائیاں جاری ہیں اور اب تک 400 سے زائد فلسطینی شہید ہو چکے ہیں۔ دوسری جانب عالمی ادارہ صحت (WHO) نے خبردار کیا ہے کہ غزہ میں 16 ہزار سے زائد مریض بیرون ملک علاج کے منتظر ہیں، جبکہ امدادی تنظیم "ڈاکٹرز ود آؤٹ بارڈرز” کا کہنا ہے کہ اصل تعداد اس سے کہیں زیادہ ہو سکتی ہے۔ WHO کے مطابق جولائی 2024 سے اب تک ہزاروں مریض بروقت طبی امداد نہ ملنے کی وجہ سے جان کی بازی ہار چکے ہیں۔

ادارے کے سربراہ ٹیڈروس ایڈہانوم نے بتایا کہ جنگ کے آغاز سے اب تک 10 ہزار 600 شدید بیمار مریضوں کو غزہ سے منتقل کیا گیا ہے، جن میں 5 ہزار 600 سے زائد بچے شامل ہیں، لیکن اب بھی ہزاروں افراد علاج کے منتظر ہیں۔اسی دوران ترک انٹیلی جنس کے سربراہ ابراہیم قالن نے استنبول میں حماس کے وفد سے ملاقات کی۔ ملاقات میں غزہ میں جنگ بندی کے دوسرے مرحلے پر عمل درآمد اور اسرائیلی خلاف ورزیوں کو روکنے کے اقدامات پر تبادلہ خیال کیا گیا۔

غزہ کی موجودہ صورتحال نہ صرف انسانی بحران کی صورت اختیار کر چکی ہے بلکہ علاقے میں طبی سہولیات، روزگار اور بنیادی انسانی ضروریات شدید خطرے میں ہیں۔ عالمی ادارے اور متعلقہ ممالک اس بحران کے حل کے لیے متعدد اقدامات کر رہے ہیں، مگر زمینی حقائق اور مسلسل حملوں کے باعث امن کی صورتحال نازک ہی رہ رہی ہے۔