اردوورلڈکینیڈا( ویب نیوز)مغربی کینیڈا کے بیشتر حصوں میں شدید سردی کی لہر جاری ہے، جس کے تحت محکمہ موسمیات نے انتباہ جاری کرتے ہوئے البرٹا کے بعض علاقوں کو برفانی کرسمس ایو اور کرسمس ڈے کے لیے تیار رہنے کا مشورہ دیا ہے۔
ماحولیات کینیڈا کے مطابق وسطی البرٹا میں کرسمس کی صبح تک 10 سے 20 سینٹی میٹر تک برف پڑنے کی توقع ہے۔ ادارے نے ڈرائیورز سے اپیل کی ہے کہ وہ سڑکوں کی خراب صورتحال کو مدنظر رکھتے ہوئے اپنے سفری منصوبوں میں تبدیلی پر غور کریں تاکہ کسی ناخوشگوار صورتحال سے بچا جا سکے۔
برف باری کی یہ وارننگز ان سردی کے انتباہات کے ساتھ جاری کی گئی ہیں جو مانیٹوبا، البرٹا اور سسکاچیوان کے مختلف حصوں میں نافذ ہیں۔ ان صوبوں میں بعض مقامات پر ہواؤں کے ساتھ محسوس کی جانے والی سردی (ونڈ چِل) منفی 45 سے منفی 50 ڈگری سینٹی گریڈ تک جا سکتی ہے۔
برٹش کولمبیا کے شمالی اندرونی علاقوں میں بھی کرسمس ڈے کے وسط تک ونڈ چِل منفی 45 ڈگری تک گرنے کا امکان ظاہر کیا گیا ہے۔ اسی طرح یوکون کے بیشتر حصوں میں کئی دنوں سے جاری شدید سردی کرسمس ایو تک برقرار رہنے کی توقع ہے، جہاں بعض علاقوں میں ونڈ چِل منفی 45 سے منفی 55 ڈگری سینٹی گریڈ تک پہنچ سکتی ہے۔
ماحولیات کینیڈا کے ماہرِ موسمیات ڈیرک لی نے منگل کے روز بتایا کہ گزشتہ ڈیڑھ ہفتے سے یوکون کے اوپر آرکٹک ہوا جمع ہو رہی ہے، جس کی وجہ سے شدید سردی دیکھنے میں آ رہی ہے۔
تاہم انہوں نے کہا کہ یہ صورتحال جلد تبدیل ہو سکتی ہے۔ہم آئندہ چند دنوں میں یوکون سے گزرنے والے موسمی نظام دیکھ رہے ہیں، جن کے ساتھ نمی اور بادل آئیں گے، جو درجہ حرارت کو موجودہ سطح سے کچھ بہتر رکھنے میں مدد دیں گے۔
ڈیرک لی کے مطابق بادل شمال سے جنوب کی جانب پھیلیں گے، جس سے نسبتاً گرم ہوا علاقے میں برقرار رہے گی، تاہم مجموعی طور پر سردی ختم نہیں ہو گی۔
انہوں نے مزید کہاممکنہ طور پر درجہ حرارت معمول سے کم ہی رہے گا، حتیٰ کہ ویک اینڈ تک بھی۔ لیکن ویک اینڈ تک درجہ حرارت آج کے مقابلے میں 10 سے 20 ڈگری تک بہتر ہو سکتا ہے۔ان کے مطابق،یعنی منفی 50 کی شدت سے نکل کر ویک اینڈ تک منفی 35 سے منفی 40 ڈگری کے درمیان درجہ حرارت متوقع ہے۔
