اردوورلڈکینیڈا(ویب نیوز)سال 2025 معاشی اتھل پتھل، عالمی تنازعات اور ماحولیاتی تبدیلی کے باعث قدرتی آفات سے عبارت رہا، اور ایک نئے لیجر سروے کے مطابق صرف ایک تہائی کینیڈین اس بات پر پُرامید ہیں کہ 2026 میں حالات بہتر ہوں گے۔ سروے سے ظاہر ہوتا ہے کہ اگرچہ بہت سے شہری آئندہ سال کے حوالے سے محتاط ہیں، تاہم ذہنی صحت کے معاملے میں وبا کے بعد نمایاں بہتری دیکھنے میں آئی ہے۔
نئے سال کے بارے میں توقعات سے متعلق سوال پر 35 فیصد شرکاء نے کہا کہ انہیں امید ہے کہ 2026، 2025 سے بہتر ہوگا۔ اس کے مقابلے میں 37 فیصد افراد کا خیال ہے کہ حالات تقریباً ویسے ہی رہیں گے، جبکہ 22 فیصد نے کہا کہ آنے والا سال گزشتہ سال سے بدتر ثابت ہو سکتا ہے۔
یہ آن لائن سروے 19 سے 21 دسمبر کے درمیان 1,523 افراد سے کیا گیا۔ چونکہ یہ آن لائن سروے تھا، اس لیے اس کے لیے غلطی کی حد (Margin of Error) مقرر نہیں کی جا سکتی۔ لیجر کے سینٹرل کینیڈا کے ایگزیکٹو نائب صدر اینڈریو اینز نے دی کینیڈین پریس کو بتایا کہ نتائج حیران کن نہیں، کیونکہ “جس قسم کا سال ہم نے گزارا ہے، اس کے بعد ایسی ہی رائے سامنے آنا فطری ہے۔”
سروے سے یہ بھی معلوم ہوا کہ وبا کے سالوں کے مقابلے میں کینیڈین شہریوں کی ذہنی صحت میں بہتری آئی ہے۔ 2025 میں 86 فیصد افراد نے اپنی ذہنی صحت کو اچھا قرار دیا، جبکہ 11 فیصد نے اسے خراب کہا۔ ان 86 فیصد میں سے 31 فیصد نے اپنی ذہنی صحت کو “بہت اچھی” اور 17 فیصد نے “شاندار” قرار دیا۔ اس کے مقابلے میں دسمبر 2020 میں 79 فیصد افراد نے ذہنی صحت کو اچھا اور 19 فیصد نے خراب بتایا تھا۔
صوبائی سطح پر دیکھا جائے تو کیوبیک کے رہائشی ذہنی صحت کے حوالے سے سب سے زیادہ مثبت نظر آئے، جہاں 91 فیصد افراد نے اپنی ذہنی صحت کو اچھا قرار دیا۔ اس کے مقابلے میں البرٹا میں یہ شرح 88 فیصد، برٹش کولمبیا میں 86 فیصد اور اونٹاریو میں 84 فیصد رہی۔
عمر کے لحاظ سے تجزیے میں سامنے آیا کہ 55 سال یا اس سے زائد عمر کے افراد نے سب سے زیادہ اپنی ذہنی صحت کو اچھا قرار دیا، جن کی شرح 93 فیصد رہی۔ 35 سے 54 سال کے افراد میں یہ شرح 83 فیصد اور 18 سے 34 سال کے نوجوانوں میں 80 فیصد رہی۔ اینڈریو اینز کے مطابق سروے سے پتا چلتا ہے کہ نوجوان کینیڈین آئندہ سال کے حوالے سے زیادہ پُرامید ہیں، جبکہ بڑی عمر کے افراد ذہنی صحت کے اعتبار سے خود کو بہتر محسوس کرتے ہیں۔
18 سے 34 سال کی عمر کے 39 فیصد افراد نے کہا کہ 2026 بہتر ہوگا، جبکہ 35 سے 54 سال کے 36 فیصد اور 55 سال یا اس سے زائد عمر کے 31 فیصد افراد نے یہی رائے دی۔
جب شرکاء سے کہا گیا کہ وہ 2025 کو بیان کرنے کے لیے الفاظ منتخب کریں تو 40 فیصد نے “غیر یقینی”، 37 فیصد نے “انتشار سے بھرپور” اور 31 فیصد نے “تھکا دینے والا” کا انتخاب کیا۔ اینز کے مطابق امریکی سیاسی حالات، سخت مقابلے والا وفاقی انتخاب، مہنگائی اور بین الاقوامی مسائل نے پورے سال کو متاثر کیے۔
سروے میں یہ بھی سامنے آیا کہ 72 فیصد افراد کے لیے سیاست، 69 فیصد کے لیے خاندانی و ذاتی ذمہ داریاں اور 67 فیصد کے لیے صحت اور فلاح و بہبود کے مسائل سال 2025 کو متاثر کرنے والے بڑے عوامل رہے۔
مزید یہ کہ 80 فیصد سے زائد شرکاء نے اس بات سے اتفاق کیا کہ “کینیڈا چند سال پہلے کے مقابلے میں ثقافتی طور پر مختلف محسوس ہوتا ہے۔” 71 فیصد نے کہا کہ دیگر کینیڈینز کے اقدامات نے انہیں بعض اوقات مایوسی دی، جبکہ 68 فیصد نے اعتراف کیا کہ انہی اقدامات نے فخر کے لمحات بھی فراہم کیے۔
