اردوورلڈکینیڈا(ویب نیوز)اگر آپ باکسنگ ڈے کے موقع پر جنوبی اونٹاریو میں سفر کا ارادہ رکھتے ہیں تو موسمی ماہرین نے خبردار کیا ہے کہ دن گزرتے گزرنے برفباری اور برفانی بارش آپ کے سفر کو متاثر کر سکتی ہے۔ موسم کی بگڑتی صورتحال کے باعث سڑکوں پر پھسلن اور حدِ نگاہ میں کمی کا خدشہ ظاہر کیا جا رہا ہے۔
محکمہ ماحولیات و موسمیاتی تبدیلی کینیڈا نے زرد رنگ کی برفباری کی وارننگ جاری کی ہے جو ٹورنٹو، ڈرہم ریجن، بیلی وِل، یارک ریجن، بیری، کولنگ ووڈ اور اوون ساؤنڈ سمیت کئی علاقوں پر لاگو ہوگی۔ وارننگ کے مطابق جمعہ کی صبح کے اختتام پر برفباری کا آغاز متوقع ہے جو شام تک جاری رہ سکتی ہے۔
محکمہ موسمیات کا کہنا ہے کہ متاثرہ علاقوں میں 8 سے 12 سینٹی میٹر تک برف پڑنے کا امکان ہے۔ تاہم ماہرین نے اس بات کی بھی نشاندہی کی ہے کہ کم دباؤ کا نظام کس سمت میں حرکت کرے گا، اس حوالے سے اب بھی کچھ غیر یقینی صورتحال موجود ہے، جس کے باعث شدید برفباری کا دائرہ مشرقی علاقوں میں کم یا زیادہ ہو سکتا ہے۔
موسمی پیش گوئی کے مطابق جمعہ کی دوپہر کے اوقات میں بعض مقامات پر برفباری خاصی شدید ہو سکتی ہے، جس سے حدِ نگاہ متاثر ہونے کا امکان ہے۔ حکام نے خبردار کیا ہے کہ برف جمع ہونے کی وجہ سے سفر مشکل ہو سکتا ہے اور ڈرائیورز کو انتہائی احتیاط برتنے اور اپنے سفری منصوبوں میں تبدیلی کرنے کا مشورہ دیا گیا ہے۔
دوسری جانب پیل ریجن، ہالٹن ریجن، ہیملٹن، کچنر-واٹرلو اور نایاگرا ریجن جیسے علاقوں کے لیے خصوصی موسمی بیان جاری کیا گیا ہے، جہاں 5 سے 10 سینٹی میٹر برفباری کے ساتھ برفانی اولے (آئس پیلیٹس) پڑنے کا امکان ظاہر کیا گیا ہے، جس سے سڑکوں کی صورتحال مزید خراب ہو سکتی ہے۔
درجہ حرارت کے حوالے سے بتایا گیا ہے کہ ٹورنٹو میں جمعرات کی رات درجہ حرارت منفی 11 ڈگری سینٹی گریڈ تک گر سکتا ہے، جبکہ جمعہ کے روز دن کا زیادہ سے زیادہ درجہ حرارت منفی 4 ڈگری اور ہفتے کے روز منفی 2 ڈگری سینٹی گریڈ رہنے کی توقع ہے۔
موسم کی شدت کے پیش نظر شہر ٹورنٹو نے طوفانی صورتحال سے نمٹنے کے لیے پانچ مقامات پر عوامی وارمنگ سینٹرز کھلے رکھنے کا فیصلہ کیا ہے تاکہ سردی سے متاثرہ افراد کو پناہ اور حرارت فراہم کی جا سکے۔
حکام نے شہریوں سے اپیل کی ہے کہ غیر ضروری سفر سے گریز کریں، گاڑیاں احتیاط سے چلائیں اور موسمی صورتحال پر مسلسل نظر رکھیں کیونکہ باکسنگ ڈے کے دوران سفر کئی علاقوں میں خاصا مشکل ثابت ہو سکتا ہے۔
