اردوورلڈکینیڈا( ویب نیوز)گلوبل اکنامک گیلپ سروے کے تازہ ترین نتائج کے مطابق پاکستان نے 2026 کے آغاز پر اقتصادی اور امن کے شعبوں میں بھارت اور عالمی اوسط دونوں پر برتری حاصل کر لی ہے۔ یہ سروے 60 ممالک میں کیا گیا اور اس میں پاکستان کی مجموعی کارکردگی نمایاں طور پر بہتر رہی۔
سروے کے مطابق پاکستان میں 51 فیصد شہری نئے سال کے حوالے سے پرامید ہیں جبکہ مجموعی طور پر 31 فیصد کا نیٹ مثبت رجحان ظاہر ہوتا ہے۔ اقتصادی حوالے سے بھی صورتحال خوش آئند ہے اور 53 فیصد پاکستانیوں کا خیال ہے کہ 2026 معاشی خوشحالی کا سال ہوگا۔
پاکستان میں پرامید لوگوں کی شرح بھارت کے 39 فیصد سے کہیں زیادہ ہے، جبکہ یہ عالمی اوسط 24 فیصد کے مقابلے میں نمایاں طور پر بلند ہے۔ امن کے میدان میں بھی پاکستانی عوام نے مثبت رجحان دکھایا: سروے کے مطابق 52 فیصد پاکستانی امید کرتے ہیں کہ دنیا میں امن بڑھے گا، جبکہ بھارت میں یہ شرح صرف 26 فیصد رہی۔ یہ سطح پاکستان میں 1994 کے بعد سب سے زیادہ امید افزا رجحانات میں سے ایک ہے۔
ماہرین کے مطابق اس طرح کے پرامید رجحانات خصوصی طور پر 1990 کی دہائی کے آخر اور 2010 کی دہائی کے وسط میں دیکھے گئے تھے۔ پاکستان نے سروے میں تین اہم شعبوں میں عالمی اوسط سے بہتر کارکردگی دکھائی: مجموعی امید، اقتصادی خوشحالی، اور امن کی توقع۔ ان میں سے دو شعبوں میں پاکستان نے بھارت پر بھی سبقت حاصل کی ہے۔
نتائج سے ظاہر ہوتا ہے کہ غیر یقینی عالمی ماحول کے باوجود پاکستانی عوام نئے سال کے حوالے سے پُراعتماد اور پُرامید ہیں۔ گلوبل اکنامک گیلپ سروے معاشی ترقی اور عالمی امن کے بارے میں نہ صرف عالمی بلکہ علاقائی سطح پر بھی ایک واضح تصویر پیش کرتا ہے، جس سے یہ بات سامنے آتی ہے کہ پاکستان کے عوام مستقبل کے حوالے سے مثبت سوچ رکھتے ہیں۔
