اردوورلڈکینیڈا(ویب نیوز)کیلگری میں گزشتہ ہفتے ہونے والے بڑے پانی کے پائپ کے پھٹنے کے بعد بیئرزپا ساؤتھ فیڈر مین کے متاثرہ حصے میں نیا پائپ نصب کر دیا گیا ہے، تاہم شہری انتظامیہ کا کہنا ہے کہ اسے دوبارہ مکمل طور پر فعال ہونے میں ابھی چند دن لگیں گے۔ اس دوران شہر بھر کے رہائشیوں سے پانی کے استعمال میں سخت کمی کی اپیل جاری رہے گی۔
یہ انتباہ ایسے وقت میں سامنے آیا ہے جب 30 دسمبر کو ہونے والے واٹر مین بریک کے بعد کیلگری کا پانی کا نظام غیر معمولی دباؤ کا شکار ہے اور شہر اس وقت اسٹیج 4 آؤٹ ڈور واٹر پابندیوں کے تحت کام کر رہا ہے۔
شہری حکام کے مطابق جمعرات کے روز کیلگری میں پانی کا استعمال 508 ملین لیٹر تک پہنچ گیا، جو کہ شہر کی پائیدار حد 485 ملین لیٹر سے کہیں زیادہ ہے، حالانکہ عوام کو مسلسل پانی بچانے کی ہدایات دی جا رہی ہیں۔
کیلگری ایمرجنسی مینجمنٹ ایجنسی کی چیف سوزن ہنری نے ایک بیان میں کہاہمیں پانی کے استعمال میں کمی کے کچھ حوصلہ افزا اشارے ملے ہیں، لیکن نظام اب بھی ایک نازک مرحلے میں ہے۔ گلین مور ریزروائر سے زیادہ مقدار میں پانی کا استعمال ہماری موجودہ اور آئندہ ہنگامی صورتحال سے نمٹنے کی صلاحیت کو متاثر کر سکتا ہے۔”
ان کے مطابق گلین مور واٹر ٹریٹمنٹ پلانٹ اس وقت اپنی معمول کی پیداوار سے تین گنا زیادہ پانی فراہم کر رہا ہے، جبکہ ریزروائر اس رفتار سے خالی ہو رہا ہے جس سے وہ دوبارہ بھر نہیں پا رہا۔ نظام کو خطرے کی حد سے باہر لانے کے لیے انہوں نے ہر کیلگری کے شہری سے روزانہ کم از کم 30 لیٹر پانی کم استعمال کرنے کی اپیل کی ہے۔
شہر کی جانب سے تجویز کردہ حفاظتی اقدامات میں صرف ضرورت کے وقت فلش کرنا، نہانے کا دورانیہ تین منٹ تک محدود رکھنا، اور ڈش واشر یا واشنگ مشین کو صرف مکمل لوڈ کے ساتھ چلانا شامل ہے۔
بدھ کے روز سٹی آف کیلگری نے پورے خطے کے لیے ایمرجنسی الرٹ جاری کیا، جس میں خبردار کیا گیا کہ پانی کی فراہمی کی سطح بدستور “انتہائی تشویشناک” ہے۔ یہ ہدایت نہ صرف کیلگری بلکہ ایئرڈری، اسٹریتھمور، چیسٹرمیئر اور تسوٹینا نیشن پر بھی لاگو ہوتی ہے، جو کیلگری کے پانی کے نظام سے منسلک ہیں۔
نئے پائپ کی تنصیب، مگر آزمائشی مراحل باقی
جمعے کے روز شہری حکام نے تصدیق کی کہ پھٹے ہوئے پائپ کی مرمت کا کام مکمل کر لیا گیا ہے۔ نیا پائپ نصب ہو چکا ہے، جگہ کو مٹی سے بھر دیا گیا ہے اور سڑک کی تعمیرِ نو کا کام جاری ہے۔ تاہم پائپ کو دوبارہ سروس میں لانے سے قبل ابھی کئی مراحل باقی ہیں۔
عملے نے جمعے سے پائپ میں آہستہ آہستہ پانی بھرنے کا عمل شروع کیا ہے، جو کئی دنوں تک جاری رہنے کی توقع ہے۔ اس کے بعد پانی کے معیار کی جانچ اور نظام کے استحکام کے مراحل مکمل کیے جائیں گے، تب جا کر پائپ کو مکمل طور پر فعال کیا جا سکے گا۔
شہری حکام کے مطابق اسٹیج 4 پابندیاں اس وقت تک برقرار رہیں گی جب تک نظام مکمل طور پر بحال نہیں ہو جاتا۔ انہوں نے یہ بھی خبردار کیا کہ جیسے جیسے دباؤ میں اضافہ ہوگا، مزید پائپ ٹوٹنے کا خدشہ موجود ہے، جس کے پیش نظر قریبی علاقوں کو ممکنہ سیلاب سے بچانے کے لیے پیشگی اقدامات کیے جا رہے ہیں۔
اس بحران نے شہر کے طویل المدتی انفراسٹرکچر منصوبہ بندی پر بھی سوالات کھڑے کر دیے ہیں۔ بدھ کے روز جاری ہونے والی ایک رپورٹ میں انکشاف کیا گیا کہ 2024 میں بیئرزپا ساؤتھ فیڈر مین کے مسئلے سے متعلق خدشات سے سٹی کونسل 2004 سے آگاہ تھی، جبکہ رپورٹ نے شہری نظم و نسق اور انتظامی ڈھانچے میں موجود کمزوریوں کی بھی نشاندہی کی ہے۔
