اردوورلڈکینیڈا (ویب نیوز)پاکستان پیپلز پارٹی نے قومی اسمبلی کے اجلاس کے بائیکاٹ کو ختم کرنے کا اعلان کر دیا ہے اور پارٹی آج ہونے والے اجلاس میں شرکت کرے گی۔ اس فیصلے کے ساتھ ہی ایوان میں سیاسی کشیدگی میں وقتی کمی آتی دکھائی دے رہی ہے۔
واضح رہے کہ پیپلز پارٹی نے گزشتہ روز اس وقت اجلاس کا بائیکاٹ کیا تھا جب بعض آرڈیننس صدرِ مملکت کی باضابطہ منظوری کے بغیر جاری ہونے کا معاملہ سامنے آیا۔ پارٹی قیادت نے اس اقدام کو آئینی اور پارلیمانی روایات کے منافی قرار دیتے ہوئے احتجاجاً اجلاس میں شریک نہ ہونے کا فیصلہ کیا تھا۔
اسی دوران سپیشل اکنامک زونز آرڈیننس سے متعلق اصل صورتحال بھی سامنے آ گئی ہے۔ وفاقی حکومت کے ذرائع کے مطابق یہ آرڈیننس چھ دیگر بلز اور ایک اضافی آرڈیننس کے ساتھ ایوانِ صدر کو منظوری کے لیے ارسال کیا گیا تھا۔ تمام سمریاں اور فائلیں ای آفس سسٹم کے ذریعے بھجوائی گئیں، جہاں ایوانِ صدر کی جانب سے اجتماعی طور پر منظوری دی گئی۔
ذرائع کا کہنا ہے کہ ای آفس کے ذریعے دی گئی اس اجتماعی منظوری کی بنیاد پر آرڈیننس جاری کر دیا گیا، تاہم جب فائلیں واپس موصول ہوئیں تو معلوم ہوا کہ سپیشل اکنامک زونز آرڈیننس پر صدرِ مملکت کے دستخط موجود نہیں تھے۔ اس تکنیکی اور قانونی سقم کے بعد وفاقی حکومت نے مذکورہ آرڈیننس واپس لینے کا فیصلہ کیا۔
وفاقی حکومت کے ذرائع نے مزید بتایا کہ اب اس آرڈیننس کو باقاعدہ بل کی صورت میں پارلیمنٹ میں پیش کیا جائے گا تاکہ اسے آئینی طریقہ کار کے مطابق منظور کرایا جا سکے۔ اسی پیش رفت کے بعد پاکستان پیپلز پارٹی نے بھی اپنا بائیکاٹ ختم کرتے ہوئے قومی اسمبلی کے اجلاس میں واپسی کا فیصلہ کیا ہے۔
