اردوورلڈکینیڈا( ویب نیوز)حکومت نے وفاقی کابینہ کی منظوری کے بعد 100، 500، 1,000 اور 5,000 روپے کے نئے کرنسی نوٹس چھاپنے کا فیصلہ کر لیا ہے۔ یہ فیصلہ وزیراعظم شہباز شریف کی زیر صدارت بدھ کو وزیراعظم ہاؤس میں ہونے والے کابینہ اجلاس میں کیا گیا۔
اجلاس میں بتایا گیا کہ نئے نوٹس بین الاقوامی معیار کے مطابق تیار کیے جائیں گے اور اس کے لیے عالمی ماہرین کی خدمات حاصل کی گئی ہیں۔ نوٹوں میں جعلی کاری روکنے کے لیے جدید اور مضبوط سکیورٹی تھریڈز شامل کیے جائیں گے۔
نئے ڈیزائن میں پاکستان کے علاقائی اور جغرافیائی تنوع کے ساتھ تاریخی مقامات کو اجاگر کیا جائے گا۔ علاوہ ازیں خواتین کے قومی ترقی میں کردار اور موسمیاتی تبدیلی جیسے موضوعات کو بھی نوٹس میں شامل کیا جائے گا۔
کرنسی نوٹس کے حتمی اجرا سے قبل مجوزہ ڈیزائنز کا مزید جائزہ لینے کے لیے کابینہ نے ایک خصوصی کمیٹی کے قیام کی بھی منظوری دی۔
اجلاس کے دوران کابینہ نے نجی حج پالیسی 2027ء تا 2030ء کے مسودے کو مزید غور و خوض کے لیے حج پالیسی کمیٹی کو بھجوانے کی ہدایت بھی کی۔ یہ مسودہ نجی حج آپریٹر کمپنیوں کی رجسٹریشن اور تھرڈ پارٹی ویریفکیشن کے معاملات پر مشتمل ہے۔
