اردوورلڈکینیڈا( ویب نیوز)وزیراعظم شہباز شریف ورلڈ اکنامک فورم (WEF) کی سالانہ کانفرنس 2026 میں شرکت کے لیے سوئٹزرلینڈ روانہ ہو گئے ہیں۔
وزیراعظم 19 تا 23 جنوری 2026 تک ڈایووس، سوئٹزرلینڈ میں منعقد ہونے والی کانفرنس میں حصہ لیں گے، جہاں انہیں مختلف عالمی رہنماؤں اور بین الاقوامی اداروں کے نمائندوں سے ملاقاتیں کرنی ہیں۔ اس موقع پر نائب وزیراعظم و وزیر خارجہ محمد اسحاق ڈار، وزیر اقتصادی امور احد چیمہ، وزیر اطلاعات عطا اللہ تارڑ، معاون خصوصی طارق فاطمی سمیت دیگر سینئر حکام بھی ان کے ہمراہ ہیں۔
دورے کے دوران وزیراعظم شہباز شریف کے شیڈول میں اہم سفارتی اور اقتصادی اجلاس شامل ہیں، جن میں عالمی سطح کے سربراہانِ مملکت اور بین الاقوامی اداروں کے قائدین سے دو طرفہ مذاکرات ہوں گے۔ دورے کا ایک کلیدی حصہ بزنس راؤنڈ ٹیبل ہے، جس کا مشترکہ اہتمام پاکستان اور ورلڈ اکنامک فورم کر رہے ہیں۔
اس نشست میں دنیا کی بڑی کمپنیاں بھی شریک ہوں گی جو پاکستان میں سرمایہ کاری کے نئے مواقع تلاش کرنے یا موجودہ سرمایہ کاری میں توسیع کرنے میں دلچسپی رکھتی ہیں۔
