اردوورلڈکینیڈا(ویب نیوز)نیشنل سائبر کرائم انویسٹی گیشن ایجنسی (این سی سی آئی اے) نے خبردار کیا ہے کہ صارفین کا ایک چھوٹا سا غیر محتاط کلک یا پوسٹ بھی جیل کے خطرے میں ڈال سکتا ہے۔
این سی سی آئی اے نے عوامی آگاہی کے لیے ایک ایڈوائزری جاری کی ہے جس میں صارفین کو تاکید کی گئی ہے کہ وہ کسی بھی پوسٹ، خبر یا لنک کو شیئر کرنے سے پہلے اس کی تصدیق کریں۔ کیا یہ مواد درست ہے؟ کیا اسے شیئر کرنا قانونی طور پر جائز ہے؟ کیا یہ کسی ادارے یا شخص کی ساکھ کو نقصان پہنچا سکتا ہے؟
ایجنسی نے واضح کیا کہ اعلیٰ عدلیہ یا دیگر مقتدر اداروں کے خلاف جھوٹی یا غیر مصدقہ معلومات پھیلانا سنگین قانونی جرم ہے اور اس کے خلاف سخت کارروائی کی جائے گی۔
این سی سی آئی اے نے صارفین کو ہدایت کی ہے کہ وہ صرف مستند ذرائع سے معلومات حاصل کریں اور افواہوں یا غیر تصدیق شدہ مواد کو آگے نہ بڑھائیں۔ اگر کوئی شہری لاپرواہی سے ایسا کرتا ہے تو اس کے خلاف سائبر قوانین کے تحت قانونی کارروائی کی جا سکتی ہے۔
ایجنسی نے مزید کہا کہ یہ ایڈوائزری عوام کو آن لائن ذمہ داری کے ساتھ مواد شیئر کرنے کی ترغیب دینے کے لیے جاری کی گئی ہے، تاکہ سائبر اسپیس میں شفافیت اور قانونی تحفظ یقینی بنایا جا سکے۔
