اردوورلڈ کینیڈا( ویب نیوز)کینیڈا کے شہر ٹورنٹو اور جنوبی اونٹاریو کے تمام علاقوں میں اتوار کے روز شدید سرد موسم کی نئی لہر داخل ہونے جا رہی ہے

جس کے پیش نظر انویائرمنٹ کینیڈا نے اورنج ونٹر اسٹورم وارننگ جاری کر دی ہے۔ محکمہ موسمیات کے مطابق بعض علاقوں میں 20 سے 40 سینٹی میٹر تک برفباری ہو سکتی ہے جبکہ تیز ہواؤں کے باعث حدِ نگاہ بعض اوقات تقریباً صفر تک گرنے کا خدشہ ہے۔انویائرمنٹ کینیڈا کا کہنا ہے کہ 50 کلومیٹر فی گھنٹہ تک کی رفتار سے چلنے والی ہوائیں برف کو اُڑا کر شدید طوفانی صورتحال پیدا کریں گی، جس سے سڑکوں پر سفر انتہائی خطرناک ہو سکتا ہے۔ اورنج الرٹ اس وقت جاری کیا جاتا ہے جب شدید موسمی حالات معمولاتِ زندگی میں خلل ڈالنے اور خطرناک حالات پیدا کرنے کا واضح امکان ہو۔محکمہ موسمیات کے مطابق جھیل کے قریب واقع علاقے، خصوصاً ڈاؤن ٹاؤن ٹورنٹو میں برفباری کی مقدار سب سے زیادہ متوقع ہے۔ جھیل اونٹاریو سے اٹھنے والی مشرقی ہوائیں ایک مخصوص برفانی پٹی، جسے ماہرین نے “اسنو سنیک” کا نام دیا ہے، تشکیل دیں گی جو برفباری کی شدت میں مزید اضافہ کرے گی۔اتوار کی صبح کے ابتدائی اوقات میں لیک ایفیکٹ سنو کا آغاز ہو جائے گا، جس کے نتیجے میں بعض مقامات پر شدید برفباری اور حدِ نگاہ میں نمایاں کمی واقع ہو گی۔ بعد ازاں دوپہر تک ایک بڑا موسمی نظام علاقے میں داخل ہوگا، جس سے برفباری مزید پھیل جائے گی اور بعض علاقوں میں برف کی مقدار معمول سے کہیں زیادہ ہو سکتی ہے۔محکمہ موسمیات نے شہریوں کو خبردار کیا ہے کہ وہ اچانک بدلتے اور بگڑتے ہوئے سفری حالات کے لیے خود کو تیار رکھیں۔ انتہائی سرد درجہ حرارت کے باعث برف ہلکی اور خشک ہوگی، جو آسانی سے ہوا کے ساتھ اُڑتی رہے گی اور وائٹ آؤٹ جیسی صورتحال پیدا کر سکتی ہے۔ یہ خطرناک حالات پیر کی صبح تک برقرار رہنے کا امکان ہے۔اسی نوعیت کی اورنج وارننگ مسساگا، برامپٹن، وان، رچمنڈ ہل، مارکھم، برلنگٹن، اوک ویل، پکرنگ اور اوشاوا کے لیے بھی جاری کی گئی ہے۔ حکام نے شہریوں کو غیر ضروری سفر سے گریز، ہنگامی سامان تیار رکھنے اور موسمی اپ ڈیٹس پر نظر رکھنے کی ہدایت کی ہے۔