اردوورلڈکینیڈا(ویب نیوز)اینگس ریڈ انسٹی ٹیوٹ کے ایک تازہ سروے کے مطابق اگر البرٹا میں علیحدگی سے متعلق ریفرنڈم ہوا تو صوبے کے نصف سے زائد شہری یقیناً کینیڈا کے ساتھ رہنے کے حق میں ووٹ دیں گے۔
پیر کے روز جاری ہونے والے اس سروے میں بتایا گیا ہے کہ 57 فیصد البرٹنز نے کہا ہے کہ وہ “یقینی طور پر” کینیڈا میں رہنے کے حق میں ووٹ دیں گے، جبکہ مزید آٹھ فیصد کا جھکاؤ بھی اسی جانب ہے۔ پانچ فیصد شہریوں نے تاحال کوئی فیصلہ نہیں کیا۔
سروے کے مطابق صرف آٹھ فیصد افراد ایسے ہیں جو یقیناً کینیڈا سے علیحدگی کے حق میں ووٹ ڈالیں گے، جبکہ 21 فیصد کا رجحان علیحدگی کی طرف ہے۔ یہ پول البرٹا میں علیحدگی کے معاملے پر تین حصوں پر مشتمل سیریز کا پہلا سروے ہے، جس میں بتایا گیا ہے کہ وفاقی انتخابات میں وزیرِ اعظم مارک کارنی اور لبرل پارٹی کی کامیابی کے بعد صوبے میں علیحدگی سے متعلق بحث میں اضافہ ہوا ہے۔
سروے میں یہ بھی جائزہ لیا گیا کہ علیحدگی یا کینیڈا کے ساتھ رہنے کے حامی افراد اپنی معلومات کن ذرائع سے حاصل کرتے ہیں۔ نتائج کے مطابق کینیڈا کے ساتھ رہنے کے حامی 71 فیصد افراد مرکزی دھارے کے نیوز ذرائع (مین اسٹریم میڈیا) پر انحصار کرتے ہیں، جبکہ علیحدگی کے حامیوں میں سے نصف کے قریب “متبادل میڈیا ذرائع” کو ترجیح دیتے ہیں۔ اس کے علاوہ 45 فیصد علیحدگی کے حامی افراد دوستوں اور خاندان سے معلومات لیتے ہیں، جبکہ 23 فیصد صوبے بھر میں ہونے والے پٹیشن اور عوامی اجتماعات سے معلومات حاصل کرتے ہیں۔ مجموعی طور پر 56 فیصد ووٹرز مین اسٹریم میڈیا جبکہ 43 فیصد سوشل میڈیا کو ترجیح دیتے ہیں۔
سیاسی جماعتوں کے حوالے سے سروے میں بتایا گیا کہ یونائیٹڈ کنزرویٹو پارٹی (UCP) کے 16 فیصد ارکان یقیناً علیحدگی کے حق میں ووٹ دیں گے، جبکہ 41 فیصد کا جھکاؤ بھی اسی طرف ہے۔ اس کے برعکس 26 فیصد یو سی پی ارکان یقیناً کینیڈا کے ساتھ رہنے کے حق میں ہیں اور 12 فیصد کا رجحان بھی یہی ہے۔ این ڈی پی کے ووٹرز کی بڑی اکثریت نے واضح طور پر کینیڈا میں رہنے کی حمایت کی ہے۔
سروے میں علیحدگی کے معاملے پر سیاسی قیادت کی کارکردگی سے متعلق سوالات بھی شامل تھے۔ سیاست دانوں میں مارک کارنی کو سات پوائنٹس کی مثبت منظوری حاصل ہوئی، جبکہ البرٹا کی وزیرِ اعلیٰ ڈینیئل اسمتھ کو منفی 17 پوائنٹس کے ساتھ سب سے زیادہ ناپسندیدگی کا سامنا ہے۔ تاہم اپنی جماعت کے حامیوں میں ان کی منظوری 67 فیصد ہے، جبکہ این ڈی پی ووٹرز میں سے 89 فیصد نے ان سے عدم اتفاق کا اظہار کیا۔
سروے کے نتائج کے مطابق کینیڈا کے ساتھ رہنے کے حامی افراد کے لیے سب سے مضبوط دلائل میں اپنی کینیڈین شناخت (92 فیصد)، البرٹا کا ملک میں بنیادی کردار (90 فیصد) اور ایک خودمختار ملک کی صورت میں صوبے کا زمینی طور پر محصور ہو جانا (93 فیصد) شامل ہیں۔ اگرچہ کینیڈا کے ساتھ رہنے کی طرف جھکاؤ رکھنے والے افراد بھی ان دلائل سے متفق ہیں، تاہم ان کی شرح نسبتاً کم ہے۔
دوسری جانب علیحدگی کے حامی افراد کا مؤقف ہے کہ وفاقی حکومت کی “نقصان دہ پالیسیوں” سے نجات (98 فیصد)، ایک آزاد البرٹا میں ذاتی آزادی کی زیادہ قدر (100 فیصد) اور صوبے کا اپنا “آزاد راستہ” اختیار کرنا (98 فیصد) ان کے لیے سب سے قائل کرنے والے دلائل ہیں۔ سروے کے مطابق علیحدگی اور اتحاد دونوں کے حق میں دلائل میں جذباتی وابستگی اور عملی حقائق نمایاں کردار ادا کر رہے ہیں۔
