اردو ورلڈ کینیڈا ( ویب نیوز ) کینیڈا کے فوڈ ریگولیٹر نے لابلا کی ملکیت میں چلنے والے ایک سپر اسٹور پر
درآمد شدہ خوراک کو “پروڈکٹ آف کینیڈا” کے طور پر پیش کرنے پر 10 ہزار ڈالر کا جرمانہ عائد کر دیا ہے۔کینیڈین فوڈ انسپیکشن ایجنسی (سی ایف آئی اے) نے بتایا کہ ٹورنٹو کے ایک اسٹور کے اندر ایک غیر ملکی مصنوعات کی تشہیر کے لیے میپل لیف کے اشتہاری اسٹیکرز استعمال کیے گئے، جس سے یہ تاثر پیدا ہوا کہ یہ مقامی کینیڈین پروڈکٹ ہے۔
ایجنسی کے مطابق > “اس اقدام سے مصنوعات کے اصل ملک کے بارے میں صارفین کو گمراہ کیا گیا۔یہ جرمانہ 15 جنوری کو جاری کیا گیا تھا تاہم اس کا اعلان اس ہفتے کیا گیا۔ سی ایف آئی اے کے پاس ہر خلاف ورزی پر زیادہ سے زیادہ 15 ہزار ڈالر تک جرمانہ عائد کرنے کا اختیار موجود ہے۔ نہ وفاقی ادارے اور نہ ہی Loblaw Companies Limited نے اس مخصوص پروڈکٹ کا نام ظاہر کیا جس پر جرمانہ عائد کیا گیا۔متعلقہ سپر اسٹور ٹورنٹو کے شمالی علاقے گیری فٹزجیرالڈ ڈرائیو پر واقع ہے۔
لابلا نے اپنے بیان میں کہا کہ وہ مصنوعات کے اصل ملک سے متعلق درست سائن ایج فراہم کرنے کی کوشش کرتی ہے، تاہم بڑے پیمانے پر اسٹاک اور انوینٹری کی وجہ سے یہ کام بعض اوقات مشکل ہو جاتا ہے۔کمپنی نے کہا کہ > “اسی لیے ہم اپنے طریقہ کار کو مزید مضبوط بنا رہے ہیں۔ اگر اس سے کسی کو الجھن ہوئی ہو تو ہمیں افسوس ہے۔”
یہ جرمانہ گزشتہ موسمِ گرما میں سی بی سی نیوز کی ایک تحقیق کے بعد سامنے آیا، جس میں انکشاف ہوا تھا کہ بعض بڑی گروسری چینز درآمدی اشیا کو کینیڈین برانڈنگ کے ساتھ فروخت کر رہی ہیں۔ اس عمل کو “میپل واشنگ” کہا جاتا ہے۔“بائے کینیڈین” تحریک کو گزشتہ سال اس وقت تقویت ملی جب سابق امریکی صدر کی جانب سے ٹیرف پالیسیوں اور کینیڈا سے متعلق بیانات سامنے آئے۔ اس رجحان سے فائدہ اٹھاتے ہوئے کئی گروسری اسٹورز نے میپل لیف اور دیگر قومی علامتوں کے ذریعے مقامی مصنوعات کو فروغ دینا شروع کیا — بعض صورتوں میں غلط انداز سے۔
تحقیق کے دوران سامنے آیا کہ ٹورنٹو کے ایک اسٹور میں کچے باداموں کو سرخ میپل لیف کے نشان اور “میڈ اِن کینیڈا” کے دعوے کے ساتھ فروخت کیا جا رہا تھا، حالانکہ کینیڈا میں بادام اگائے ہی نہیں جاتے ۔گزشتہ ستمبر میں کئی صارفین نے شکایت کی تھی کہ سی ایف آئی اے نے ان درجنوں کیسز میں جرمانے عائد نہیں کیے جنہیں خود ایجنسی نے دریافت کیا تھا۔
سی ایف آئی اے کا کہنا ہے کہ وہ فوڈ لیبلنگ کو سنجیدگی سے لیتا ہے اور ہر کیس میں مختلف عوامل کو مدنظر رکھتا ہے جن میں صحت اور خطرے کے عوامل، کمپنی کی ماضی کی کارکردگی ، مسئلے کے حل میں کمپنی کا تعاون تاہم ایجنسی نے اس سوال کا جواب نہیں دیا کہ گزشتہ اپریل میں غلط لیبلنگ کے ایک کیس میں سوبیز پر جرمانہ کیوں عائد نہیں کیا گیا تھا۔
