اردو ورلڈ کینیڈا ( ویب نیوز ) کینیڈا کے وزیر اعظم مارک کارنی نے اپنے چار روزہ دورۂ ہندوستان کا آغاز ممبئی پہنچ کر کر دیا۔
آمد کے بعد میڈیا سے گفتگو کرتے ہوئے انہوں نے کہا کہ ہندوستان دنیا کی بڑی معیشتوں میں سب سے تیزی سے ترقی کرنے والی معیشت ہے اور عالمی اقتصادی منظرنامے میں اس کا کردار تیزی سے بڑھ رہا ہے۔وزیر اعظم کارنی اتوار کو نئی دہلی روانہ ہوں گے جہاں پیر کے روز ان کی ہندوستان کے وزیر اعظم نریندر مودی کے ساتھ اہم دو طرفہ ملاقات متوقع ہے۔ اس ملاقات میں تجارت، سرمایہ کاری، توانائی، ٹیکنالوجی اور اسٹریٹجک تعاون سمیت مختلف شعبوں پر تفصیلی تبادلہ خیال کیا جائے گا۔یہ دورہ 2023 میں پیدا ہونے والے سفارتی تنازع کے بعد دونوں ممالک کے تعلقات کو معمول پر لانے کی کوششوں کا حصہ سمجھا جا رہا ہے۔ حکام کے مطابق کینیڈا اور ہندوستان دونوں اس بات کے خواہاں ہیں کہ باہمی اعتماد کو بحال کر کے اقتصادی اور تجارتی روابط کو مزید فروغ دیا جائے۔
ممبئی میں قیام کے دوران وزیر اعظم کارنی کاروباری رہنماؤں، مالیاتی ماہرین اور اختراعی شعبے سے تعلق رکھنے والی اہم شخصیات پر مشتمل ایک اعلیٰ سطحی وفد سے ملاقاتیں کر رہے ہیں۔ ان ملاقاتوں کا مقصد سرمایہ کاری کے نئے مواقع تلاش کرنا اور دونوں ملکوں کے نجی شعبوں کے درمیان روابط کو مضبوط بنانا ہے۔کارنی نے سوشل میڈیا پر اپنے پیغام میں کہا کہ ہندوستان کے ساتھ مضبوط کمیونٹی شراکت داری قائم کرنے سے کینیڈین کارکنوں اور کاروباری اداروں کے لیے نئے دروازے کھلیں گے۔ انہوں نے اس بات پر زور دیا کہ دونوں ممالک کے درمیان اقتصادی تعاون نہ صرف روزگار کے مواقع پیدا کرے گا بلکہ عالمی سطح پر مسابقتی صلاحیت کو بھی بڑھائے گا۔
تجزیہ کاروں کے مطابق یہ دورہ اسٹریٹجک اور اقتصادی تعاون کو نئی سمت دینے کے لیے ایک اہم پیش رفت ثابت ہو سکتا ہے۔ توقع کی جا رہی ہے کہ اس دوران توانائی، مصنوعی ذہانت، صاف ٹیکنالوجی اور تعلیم کے شعبوں میں بھی تعاون بڑھانے پر بات چیت ہوگی، جس سے دونوں ممالک کے تعلقات میں ایک مثبت پیش رفت سامنے آ سکتی ہے۔
