اردوورلڈکینیڈا( ویب نیوز)عازمینِ حج کے لیے خوشخبری ہے کہ رواں برس حج پروازوں کا باقاعدہ شیڈول جاری کر دیا گیا ہے اور پاکستان سے پہلی حج پرواز 18 اپریل کو روانہ ہوگی۔
سرکاری حج اسکیم کے تحت مجموعی طور پر 468 پروازوں کے ذریعے ایک لاکھ 19 ہزار عازمین کو حجازِ مقدس پہنچایا جائے گا۔ حکام کے مطابق تمام انتظامات مکمل کر لیے گئے ہیں اور عازمین کو بروقت، محفوظ اور باوقار انداز میں سعودی عرب منتقل کرنے کے لیے خصوصی اقدامات کیے جا رہے ہیں۔
ذرائع کے مطابق 18 اپریل کو کراچی، لاہور، سیالکوٹ اور ملتان سے پہلی پروازیں روانہ ہوں گی۔ حج آپریشن کے پہلے روز چار پروازوں کے ذریعے عازمین کو مدینہ منورہ پہنچایا جائے گا۔ ابتدائی پندرہ روز تک زیادہ تر عازمین کو مدینہ منورہ منتقل کیا جائے گا تاکہ وہ مسجد نبویؐ میں حاضری کی سعادت حاصل کر سکیں۔
حکام کے مطابق جدہ کے لیے حج پروازوں کا آغاز 4 مئی سے ہوگا، جبکہ مدینہ منورہ کے لیے پہلی طویل دورانیے کی خصوصی پرواز 7 مئی کو روانہ کی جائے گی۔ پاکستان سے آخری حج پرواز 21 مئی کو اڑان بھرے گی اور اس طرح مجموعی حج آپریشن چونتیس روز تک جاری رہے گا۔
اعداد و شمار کے مطابق سرکاری اسکیم کے تحت 67 ہزار 230 مرد اور 51 ہزار 846 خواتین عازمین کو سعودی عرب لے جایا جائے گا۔ مدینہ منورہ کے لیے 186 جبکہ جدہ کے لیے 282 پروازیں چلائی جائیں گی۔ حج آپریشن میں قومی و نجی فضائی کمپنیاں حصہ لیں گی جن میں پاکستان انٹرنیشنل ایئرلائن، ایئر بلیو، ایئر سیال اور سعودی ایئر لائن شامل ہیں۔
ملک کے آٹھ شہروں سے حج پروازیں آپریٹ کی جائیں گی۔ اسلام آباد سے 129، کراچی سے 124 اور لاہور سے 104 پروازیں روانہ ہوں گی۔ اسی طرح کوئٹہ سے 18، ملتان سے 34، سیالکوٹ سے 26، فیصل آباد سے 23 اور سکھر سے 5 پروازیں عازمین کو سعودی عرب پہنچائیں گی۔
متعلقہ حکام کا کہنا ہے کہ عازمین کی سہولت کے لیے تربیتی نشستیں، ویکسینیشن، سفری رہنمائی اور سامان کی نگرانی سمیت تمام امور کو منظم انداز میں مکمل کیا جا رہا ہے تاکہ ہر حاجی کو بہترین سہولت میسر آ سکے اور وہ اطمینان کے ساتھ اپنے روحانی سفر کا آغاز کر سکے۔
