اردوورلڈکینیڈا( ویب نیوز)فوج کے سربراہ اور چیف آف ڈیفنس فورسز فیلڈ مارشل سید عاصم منیر نے سعودی عرب کے اہم دورے کے دوران سعودی وزیر دفاع شہزادہ خالد بن سلمان سے ملاقات کی۔
جس میں خطے کی موجودہ سلامتی کی صورتحال، ایران کے ساتھ بڑھتی کشیدگی اور مشترکہ دفاعی تعاون کے مختلف پہلوؤں پر تفصیلی تبادلہ خیال کیا گیا۔
دستیاب معلومات کے مطابق یہ ملاقات ایسے وقت میں ہوئی ہے جب خطے میں سیکیورٹی کے حوالے سے تشویش میں اضافہ دیکھا جا رہا ہے۔ ملاقات کے دوران دونوں رہنماؤں نے مملکت سعودی عرب پر مبینہ ایرانی ڈرون اور میزائل حملوں کے بعد پیدا ہونے والی صورتحال کا جائزہ لیا اور اس بات پر غور کیا کہ مستقبل میں ایسے خطرات سے نمٹنے کے لیے باہمی تعاون کو مزید مضبوط کیسے بنایا جا سکتا ہے۔
گفتگو کے دوران اسٹریٹجک باہمی دفاعی تعاون کے دائرہ کار میں مشترکہ اقدامات پر بھی غور کیا گیا۔ دونوں رہنماؤں نے اس بات پر اتفاق کیا کہ کسی بھی ملک کی جانب سے بلا اشتعال جارحیت نہ صرف خطے کے امن و استحکام کے لیے خطرہ بنتی ہے بلکہ اس سے سفارتی کوششیں بھی متاثر ہوتی ہیں جو تنازعات کو پرامن طریقے سے حل کرنے کے لیے کی جا رہی ہوتی ہیں۔
ملاقات میں اس امر پر بھی زور دیا گیا کہ خطے میں پائیدار امن کے لیے ضروری ہے کہ تمام فریق دانشمندی اور تحمل کا مظاہرہ کریں۔ دونوں رہنماؤں نے اس امید کا اظہار کیا کہ برادر ملک ایران کسی بھی ممکنہ غلط فہمی سے بچنے کے لیے ذمہ دارانہ طرز عمل اختیار کرے گا اور ایسی صورتحال پیدا نہیں ہونے دے گا جو کشیدگی میں مزید اضافے کا باعث بنے۔
مزید برآں پاکستان اور سعودی عرب کے درمیان دفاعی تعاون کو مزید مضبوط بنانے کے عزم کا بھی اعادہ کیا گیا۔ دونوں ممالک نے اس بات پر اتفاق کیا کہ موجودہ حالات میں قریبی رابطہ اور مشترکہ حکمت عملی خطے کے امن، استحکام اور سلامتی کے لیے نہایت اہم ہے۔
