اردو ورلڈ کینیڈا ( ویب نیوز ) مشرقِ وسطیٰ میں جاری کشیدگی کے دوران نیتن یاہو نے دعویٰ کیا ہے
کہ ایران کی موجودہ حکومت کے خاتمے کے لیے ایک منظم منصوبہ موجود ہے اور اس حوالے سے پیش رفت بھی جاری ہے۔ایک بیان میں اسرائیلی وزیراعظم نے کہا کہ اسرائیل اور امریکہ نے مشترکہ کارروائیوں کے ذریعے ایران کی فضائی حدود پر تقریباً مکمل کنٹرول حاصل کر لیا ہے۔ ان کے مطابق اس حکمتِ عملی کا مقصد ایران کی عسکری صلاحیت کو کمزور کرنا اور خطے میں سیکیورٹی خطرات کو ختم کرنا ہے۔نیتن یاہو نے اپنے بیان میں کہا کہ ایران کی پاسداران انقلاب کے وہ اہلکار جو ہتھیار ڈال دیں گے انہیں نقصان نہیں پہنچایا جائے گا۔ ان کا کہنا تھا کہ اسرائیل ان ممالک کے ساتھ کھڑا ہے جو ایرانی حملوں کا نشانہ بنے ہیں اور ایسے کئی ممالک اسرائیل سے مسلسل رابطے میں ہیں۔
جنگ طویل نہیں ہوگی، اسرائیلی سفیر
ادھر اسرائیل کے سفیر نے بھی میڈیا سے گفتگو کرتے ہوئے کہا کہ موجودہ جنگ زیادہ طویل نہیں ہوگی اور اسرائیل اپنے مقاصد کے حصول کے لیے کارروائیاں جاری رکھے گا۔
ایران کا رد عمل
دوسری جانب ایران کے وزیر خارجہ عباس عراقچی نے اسرائیلی وزیراعظم کے بیان پر ردعمل دیتے ہوئے کہا کہ نیتن یاہو نے اپنی جنگ میں امریکا کو بھی پھنسا دیا ہے۔انہوں نے دعویٰ کیا کہ صرف ایک ہفتے کی جنگ میں امریکا کے 100 ارب ڈالر خرچ ہو چکے ہیں۔ عباس عراقچی کے مطابق اگر امریکا جنگ میں مزید شدت چاہتا ہے تو ایران نے بھی طویل جنگ کے لیے مکمل تیاری کر رکھی ہے۔
خطے میں بڑھتی ہوئی کشیدگی
حالیہ دنوں میں ایران اور اسرائیل کے درمیان براہ راست حملوں کے تبادلے کے بعد مشرقِ وسطیٰ میں صورتحال انتہائی کشیدہ ہو چکی ہے۔ ماہرین کے مطابق اگر کشیدگی کم نہ ہوئی تو یہ تنازع وسیع علاقائی جنگ کی شکل اختیار کر سکتا ہے جس کے اثرات عالمی معیشت اور توانائی کی منڈیوں پر بھی پڑ سکتے ہیں۔
