اردو ورلڈ کینیڈا ( ویب نیوز ) مشرقِ وسطیٰ میں بڑھتی ہوئی کشیدگی کے باعث انٹرنیشنل کرکٹ کونسل (آئی سی سی) کی اہم میٹنگ ملتوی کر دی گئی ہے۔

آئی سی سی کی یہ میٹنگ 25 سے 27 مارچ تک قطر کے دارالحکومت دوحا میں منعقد ہونے والی تھی، تاہم خطے کی موجودہ کشیدہ صورتحال کے پیش نظر اسے مؤخر کرنے کا فیصلہ کیا گیا ہے۔بھارتی کرکٹ ویب سائٹ کے مطابق، میٹنگ اب اپریل میں ہونے کا امکان ظاہر کیا جا رہا ہے، تاہم نئی تاریخ کا باضابطہ اعلان ابھی تک نہیں کیا گیا۔ آئی سی سی نے اپنے تمام رکن ممالک کو میٹنگ کے ملتوی ہونے سے آگاہ کر دیا ہے۔
رپورٹس کے مطابق، امکان ہے کہ اجلاس اب کسی دوسرے مقام پر منعقد کیا جائے گا تاکہ عالمی کرکٹ سے متعلق اہم فیصلے بلا رکاوٹ جاری رکھے جا سکیں۔ آئی سی سی کی میٹنگ میں رکن ممالک کے نمائندے کرکٹ کی ترقی، عالمی ٹورنامنٹس کے شیڈول اور دیگر اہم امور پر تبادلہ خیال کرنے والے تھے۔