اردو ورلڈ کینیڈا ( ویب نیوز ) یمن کی حوثی تنظیم انصار اللہ کے ایک سینئر عہدیدار نے اہم سمندری گزرگاہ باب المندب کو بند کرنے کی دھمکی دے دی ہے
جس کے بعد عالمی سطح پر تشویش میں اضافہ ہو گیا ہے۔حوثی تنظیم کے ڈپٹی وزیر خارجہ نے اپنے بیان میں کہا ہے کہ اگر حالات نے تقاضا کیا تو وہ باب المندب کو مکمل طور پر بند کر سکتے ہیں اور اگر ہم نے یہ راستہ بند کر دیا تو کوئی بھی اسے دوبارہ کھول نہیں سکے گا ۔
باب المندب دنیا کی اہم ترین تجارتی گزرگاہوں میں شمار ہوتا ہے جو بحیرہ احمر کو خلیج عدن سے ملاتا ہے۔ اس راستے سے یورپ، ایشیا اور مشرق وسطیٰ کے درمیان بڑی مقدار میں تیل اور تجارتی سامان کی ترسیل ہوتی ہے، اس لیے کسی بھی ممکنہ بندش کے عالمی معیشت پر گہرے اثرات مرتب ہو سکتے ہیں۔
تجزیہ کاروں کے مطابق اس قسم کی دھمکی نہ صرف خطے میں کشیدگی کو بڑھا سکتی ہے بلکہ عالمی شپنگ، توانائی کی قیمتوں اور سپلائی چین کو بھی شدید متاثر کر سکتی ہے۔واضح رہے کہ یمن میں جاری تنازع اور خطے میں بڑھتی ہوئی کشیدگی کے باعث اس اہم سمندری راستے کی سیکیورٹی پہلے ہی عالمی طاقتوں کیلئے ایک بڑا چیلنج بنی ہوئی ہے۔
