اردوورلڈکینیڈا(ویب نیوز)کینیڈا کے صوبہ کیوبیک میں حکومت اور ماہر معالجین کی نمائندہ تنظیم کے درمیان ایک اہم پیش رفت سامنے آئی ہے، جہاں دونوں فریق ایک اصولی معاہدے تک پہنچ گئے ہیں۔ یہ اعلان پیر کی سہ پہر صوبائی قیادت اور تنظیم کی جانب سے سماجی ذرائع ابلاغ پر کیا گیا۔
صوبائی حکومت کی نمائندگی کرتے ہوئے کرسٹین فریشیٹ نے بتایا کہ ماہر معالجین کی تنظیم فیڈریشن دے میدیسیں سپیشیالسٹ دو کیوبیک کے ساتھ اصولی اتفاق رائے حاصل ہو گیا ہے۔ انہوں نے اپنے بیان میں کہا کہ حکومت نے گزشتہ ہفتے ذمہ داریاں سنبھالنے کے فوراً بعد خزانہ بورڈ کی صدر فرانس ایلاین دورانسو اور وزیر صحت سونیا بیلانژے کے ساتھ ملاقات کر کے مذاکرات کی صورتحال کا جائزہ لیا تھا۔
ان کے مطابق حکومت کے لیے یہ نہایت ضروری تھا کہ اس مسئلے کا جلد از جلد حل نکالا جائے تاکہ عوام کو بہتر طبی سہولیات فراہم کی جا سکیں۔ انہوں نے واضح کیا کہ اس معاہدے میں عوام کی مالی استطاعت کو مدنظر رکھا گیا ہے اور اس سے صوبے بھر میں علاج تک رسائی بہتر بنانے میں مدد ملے گی۔ تاہم معاہدے کی تفصیلات فی الحال ظاہر نہیں کی گئیں اور انہیں تنظیم کے اندرونی جائزے کے بعد سامنے لایا جائے گا۔
دوسری جانب تنظیم کے صدر ونسان اولیوا نے رواں ماہ کے آغاز میں مذاکرات کی بحالی کو درست سمت میں ایک اہم قدم قرار دیا تھا۔ اس سے قبل دونوں فریقین کے درمیان مذاکرات کئی ہفتوں تک تعطل کا شکار رہے اور آخری باضابطہ ملاقات اکتیس جنوری کو ہوئی تھی۔
یاد رہے کہ ماہر معالجین کی جانب سے پانچ برس کے دوران چودہ اعشاریہ پانچ فیصد تنخواہوں میں اضافے کا مطالبہ کیا جا رہا تھا، جبکہ حکومت کی پیشکش گیارہ فیصد تک محدود تھی۔ موجودہ اصولی مکعاہدے میں کس حد تک اتفاق ہوا ہے، اس بارے میں ابھی کوئی حتمی معلومات سامنے نہیں آئیں۔
قابل ذکر بات یہ ہے کہ صوبائی حکومت اس سے قبل خاندانی معالجین کے لیے چودہ اعشاریہ پانچ فیصد اضافے کے ساتھ مزید ڈھائی فیصد اضافی رقم کی منظوری دے چکی ہے، جو مخصوص طبی اہداف حاصل کرنے کی صورت میں دی جائے گی۔ اس پیش رفت کو صوبے کے نظامِ صحت میں بہتری کی ایک اہم کڑی کے طور پر دیکھا جا رہا ہے۔
