اردوورلڈکینیڈا(ویب نیوز)آئندہ مالی سال کے وفاقی بجٹ میں تنخواہ دار طبقے کو ٹیکس ریلیف دینے کے لیے اہم تجاویز پر کام مکمل کر لیا گیا ہے، جن کے تحت ماہانہ ایک لاکھ، دو لاکھ اور تین لاکھ روپے تنخواہ لینے والے افراد کو ٹیکس میں کمی دینے پر غور کیا جا رہا ہے۔
ذرائع کے مطابق انکم ٹیکس کی شرح میں کمی اور ایک کروڑ روپے یا اس سے زائد سالانہ آمدن پر عائد دس فیصد سرچارج ختم کرنے کی بھی تیاریاں کی گئی ہیں۔ اس کے ساتھ ساتھ تنخواہ دار طبقے کے لیے ٹیکس سلیبز کی تعداد چھ سے بڑھا کر آٹھ کرنے کی تجویز بھی زیر غور ہے۔ ان مجوزہ اقدامات پر وزیراعظم شہباز شریف کو بریفنگ دی جا چکی ہے جبکہ حتمی منظوری کے لیے بین الاقوامی مالیاتی ادارے کی منظوری کا انتظار کیا جا رہا ہے۔
ذرائع کا کہنا ہے کہ آئندہ وفاقی بجٹ میں تنخواہ دار طبقے کو ریلیف دینے کے لیے تین مختلف تجاویز اس ادارے کے ساتھ شیئر کی گئی ہیں، جن پر حتمی فیصلہ جلد متوقع ہے۔ ان تجاویز کے مطابق ٹیکس میں کمی کی شرح تین، پانچ یا دس فیصد تک رکھی جا سکتی ہے۔
مزید تفصیلات کے مطابق موجودہ نظام کے تحت سالانہ بارہ لاکھ، بائیس لاکھ اور بتیس لاکھ روپے تک آمدن رکھنے والے افراد کے لیے انکم ٹیکس کی شرح میں کمی کی تجویز دی گئی ہے۔ اس کے علاوہ چھٹی اور آخری سلیب، جس میں سالانہ اکتالیس لاکھ روپے یا اس سے زائد آمدن رکھنے والے افراد شامل ہیں، کو بڑھا کر ستر لاکھ روپے تک کرنے کی بھی تجویز ہے۔
اسی طرح ایک نئی ٹیکس سلیب ایک کروڑ روپے یا اس سے زائد سالانہ آمدن رکھنے والوں کے لیے متعارف کرانے پر غور کیا جا رہا ہے۔ اس طبقے پر اس وقت دس فیصد سرچارج عائد ہے، جسے ختم کرنے یا کم کر کے پانچ فیصد تک لانے کی تجویز بھی پیش کی گئی ہے۔
ذرائع کے مطابق حکومت نے برآمدکنندگان کے لیے بھی ایک بڑا ریلیف پیکج تیار کیا ہے، جس کے تحت ایک فیصد ایڈوانس ٹیکس ختم کرنے کی تجویز دی گئی ہے۔ اس اقدام سے برآمدی شعبے کو تقریباً ساٹھ ارب روپے تک کا ریلیف ملنے کا امکان ظاہر کیا جا رہا ہے۔
حکام کے مطابق تنخواہ دار طبقے، برآمدکنندگان اور مجموعی ٹیکس ڈھانچے میں اصلاحات کا مقصد معاشی دباؤ کو کم کرنا اور کاروباری سرگرمیوں کو فروغ دینا ہے، تاہم تمام فیصلوں کا انحصار بین الاقوامی مالیاتی ادارے کی حتمی منظوری پر ہوگا۔
