اردوورلڈکینیڈا(ویب نیوز)دفتر خارجہ کے ترجمان نے اپنے بیان میں کہا ہے کہ مسئلہ کشمیر ایک بین الاقوامی سطح پر تسلیم شدہ متنازعہ خطہ ہے اور اس کا حتمی حل اقوام متحدہ کی سلامتی کونسل کی قراردادوں کے مطابق ہونا چاہیے، جن میں کشمیری عوام کو حقِ خودارادیت دینے کا وعدہ کیا گیا ہے۔

ترجمان نے کہا کہ بھارت کے غیر ذمہ دارانہ بیانات مقبوضہ کشمیر کی اصل صورتحال سے توجہ ہٹانے کی کوشش ہیں اور ان بیانات کی کوئی قانونی یا اخلاقی حیثیت نہیں۔

ترجمان نے مزید بتایا کہ صومالیہ میں یرغمال بنائے گئے پاکستانی شہریوں کی رہائی کے لیے حکومت ہر ممکن سفارتی کوششیں کر رہی ہے۔ یہ شہری ایک کارگو جہاز پر موجود ہیں اور ان کے ساتھ دیگر ممالک کے عملے کے افراد بھی شامل ہیں۔ حکومت پاکستان اس معاملے پر صومالی حکام اور متعلقہ فریقین سے مسلسل رابطے میں ہے تاکہ ان کی محفوظ واپسی ممکن بنائی جا سکے۔

دفتر خارجہ نے مشرق وسطیٰ اور خلیجی خطے میں کشیدگی پر بھی تشویش کا اظہار کرتے ہوئے تمام فریقین سے جنگ بندی کے معاہدوں کا احترام کرنے اور مسائل کے حل کے لیے مذاکرات اور سفارت کاری اختیار کرنے کی اپیل کی ہے۔