اردو ورلڈ کینیڈا ( ویب نیوز ) خطے میں جاری سفارتی سرگرمیوں کے دوران ایرانی وزیر عباس عراقچی کی کل پاکستان آمد کا امکان ظاہر کیا جا رہا ہے
امریکا اور ایران کے اعلیٰ سطحی وفود کے درمیان سوئٹزرلینڈ کے شہر جنیوا میں اہم ملاقات بھی متوقع ہے۔یہ پیش رفت ایسے وقت میں سامنے آئی ہے جب دونوں ممالک کے درمیان جاری کشیدگی کے خاتمے اور ممکنہ معاہدے کے حوالے سے سفارتی کوششیں تیز ہو چکی ہیں۔ذرائع کے مطابق ایرانی وزیر خارجہ کا دورۂ پاکستان امریکا اور ایران کے درمیان جاری مذاکراتی عمل سے جڑا ہوا ہے۔
پاکستان گزشتہ کئی ماہ سے دونوں ممالک کے درمیان رابطوں اور اعتماد سازی کی کوششوں میں کردار ادا کرتا رہا ہے، اور پاکستانی حکام متعدد مواقع پر مذاکرات میں پیش رفت کی تصدیق بھی کر چکے ہیں۔دوسری جانب امریکی صدر ٹرمپ نے حالیہ بیان میں کہا تھا کہ ایران کے ساتھ ایک اہم معاہدے پر اس ہفتے کے اختتام تک دستخط ہونے کا امکان ہے اور تقریب یورپ میں منعقد ہو سکتی ہے۔
بعد ازاں مختلف بین الاقوامی ذرائع نے رپورٹ کیا کہ ممکنہ دستخطی تقریب جنیوا میں منعقد کیے جانے کی تیاریاں جاری ہیں۔اطلاعات کے مطابق زیر غور مفاہمتی دستاویز میں آبنائے ہرمز میں بحری آمدورفت کی بحالی، ایران پر عائد بعض پابندیوں میں نرمی، جنگ بندی کے اقدامات اور مستقبل میں جوہری معاملات پر مزید مذاکرات کا فریم ورک شامل ہو سکتا ہے۔
تاہم تہران نے واضح کیا ہے کہ ابھی کسی حتمی معاہدے کی منظوری نہیں دی گئی اور متعدد نکات پر مشاورت جاری ہے۔سفارتی حلقوں کا کہنا ہے کہ اگر جنیوا میں متوقع ملاقات مثبت نتائج دیتی ہے تو یہ نہ صرف امریکا اور ایران کے تعلقات میں بہتری کی راہ ہموار کر سکتی ہے بلکہ مشرقِ وسطیٰ میں کشیدگی کم کرنے اور عالمی توانائی منڈیوں میں استحکام لانے میں بھی اہم کردار ادا کر سکتی ہے۔پاکستانی حکام کی جانب سے ابھی ایرانی وزیر خارجہ کے دورے کے مکمل شیڈول کا باضابطہ اعلان نہیں کیا گیا، تاہم سفارتی ذرائع اس دورے کو خطے کی حالیہ اہم ترین سفارتی پیش رفت قرار دے رہے ہیں۔
