اردوورلڈکینیڈا(ویب نیوز)وفاقی حکومت نے آئندہ مالی سال کے بجٹ 2026-27 میں کم از کم ماہانہ اجرت میں 10 فیصد اضافے کا اعلان کر دیا ہے، جس کے بعد ملک میں کم از کم تنخواہ 37 ہزار روپے سے بڑھ کر 40 ہزار 700 روپے ہو جائے گی۔
وفاقی وزیر خزانہ محمد اورنگزیب نے قومی اسمبلی میں بجٹ پیش کرتے ہوئے کہا کہ حکومت کا مقصد کم آمدن والے طبقے پر بڑھتے ہوئے مہنگائی کے دباؤ کو کم کرنا ہے۔ ان کے مطابق یہ اضافہ وزیراعظم کے اس وعدے کی تکمیل ہے جس میں تنخواہ دار طبقے کو مالی ریلیف دینے کا عزم کیا گیا تھا۔
وزیر خزانہ نے کہا کہ کم از کم اجرت میں اضافہ براہِ راست مزدور طبقے کی آمدن میں بہتری لائے گا اور انہیں روزمرہ اخراجات پورے کرنے میں سہولت فراہم کرے گا۔
بجٹ میں ایک اور اہم اعلان کے مطابق تنخواہ دار طبقے پر عائد سرچارج ختم کر دیا گیا ہے، جس سے سرکاری اور نجی شعبے میں کام کرنے والے لاکھوں ملازمین کو مالی ریلیف ملنے کی توقع ہے۔
وزیر خزانہ نے مزید کہا کہ حکومت کو سرکاری اور نجی ملازمین کی مشکلات کا ادراک ہے اور ان کے لیے معاشی آسانیاں پیدا کرنے کے اقدامات جاری رہیں گے۔ انہوں نے یقین دہانی کرائی کہ آئندہ پالیسیوں میں تنخواہ دار طبقے کو خصوصی ترجیح دی جائے گی تاکہ ان کی قوتِ خرید بہتر ہو سکے۔
